Ezekiyeli 28 - Bhibhiliya Nya Guage

Giprofeto khu mufumeli wa Tiro

¹ Pfhumu Nungungulu a di ganela ni eni, khuye:

² “Mwamana wa muthu, embela mufumeli wa Tiro, khuwe: Mune Pfhumu Nungungulu, a ngu ganela kharati, khuye: Olu matshandza ma manidego wulanga monyoni gwago, u ganela, khuwe: Eni nyi Nungungulu nyi khadego vbagikhalotunu gya Nungungulu vbakari nya yiphwa, aholu u muthu basi khuri Nungungulu, ambari monyoni gwago u dzi vegago kha nga Nungungulu.

³ Lisine, uwe u nguti ngudzu guvbindra Dhaniyeli, wu mwalo ni sihalo moyo wu gu hangago.

⁴ Khu guti gwago ni wugengeli wago, u manide dzithomba, u wungedzede ndralama ni parata sisangalani gwago;

⁵ khu kotani nya guandre nya guti gwago, omu nya wugwewo wago, u engedzede dzithomba dzago; gambe khu kotani nya idzo, u ngu dzi gugumugisa.

⁶ Khu guralo, Mune Pfhumu Nungungulu a ngu ganela kharati, khuye: Kha nga olu monyo wago wu dzi vegago kha nga Nungungulu,

⁷ wona nya gukhuwe nyi na gu rumela vathu va mambe mayigo nya dzihanyi, nya gigaha va vbakari nya mayigo, avo va nata homolago matshari khu siwununi gwawe vata gu dwanisa, gasi guvbedza wumburi nya guti gwago, gambe va na nyenyezisa wuzundzo wago.

⁸ Avo va na gu reledza phalani, u na songwa khu masongelo nya nga vale va payidwego vbakari nya yiphwa.

⁹ Ina u na ganela mbeli ga wule a na gu songago, khuwe: Eni kheni Nungungulu, gani? Kholu uwe mandzani ga vale va gu songago, u muthu basi, khuri Nungungulu.

¹⁰ Uwe u nafa kha nga va nyamba hana wugwera mandzani ga vathu va mambe mayigo. Kholu Eni nyi ganede. A ngu ganela Mune Pfhumu Nungungulu.”

Gililo khu mufumeli wa Tiro

¹¹ Pfhumu Nungungulu a di nyi embela, khuye:

¹² “Mwamana wa muthu, gira gililo u girela mufumeli wa Tiro, u mu embela, khuwe: Mune Pfhumu Nungungulu, a ngu ganela kharati, khuye: Uwe u giwonelo nya wuwadi, nu tade khu guti ni wumburi.

¹³ Uwe u diromo Edheni, thembweni ga Nungungulu; u di gu dzi fenengedza khu siwindri satshavbo nya lisima a gu esi: Saridhiyo, topaziyo, dayimani, bherilo, onikisi, jasiperi, safira, karibhukulo ni esmeralidha; ndralama a diri iyo sikwinyaro sago, iso si lulamisedwego litshigu u vangidwego.

¹⁴ Uwe u diri likerubhimi li todzidwego gasi gu ghadha, nyi gu emiside; u diromo mugigomoni nya gukatege gya Nungungulu, u di gimbila musiwindrini nya gukhedzige.

¹⁵ Uwe u di lulamide dzindzilani gwago, gukhugela guvangwani gwago, kala gu ngata tugudwa guvivba avbo gwago.

¹⁶ Guandrani nya wugwewo wago, monyo wago wu di taledwa khu dzihanyi u ghoha. Khu kotani nya isoso, nyi na gu dzudzuga na wu nyenyezide, hwindzo ni gigomo gya Nungungulu, nyi na gu mbembisa vbakari nya siwindri nya gukhedzige, uwe likerubhimi nya muvhikeli.

¹⁷ Monyo wago wu khade matshandza khu kotani nya gumbure gwago, u dzudzuga guti gwago khu kotani nya gungangamele gwago, khu guralo, nyi gu dzudzugide mafuni, nyi gu gira gihegiso mbeli ga vafumeli, gasi va fela gu gu wona.

¹⁸ Khu kotani nya gutale nya sighoho sago, ni wugwewo wago nya wudambane, u nyenyeziside dzinyumbani gwago nya miphaso. Khu guralo, nyi duside nilo khu vbakari gwago, wu ta gu dagaredzisa, u tsagama u khala nguma mafuni, mahoni ga vatshavbo va nga bani va gu wona.

¹⁹ Mayigo yatshavbo ma nga bani ma guti, ma na tala khu gu liwuga ma gu gu wona; kholu u khade gilo nya gihegiso, u na fuva nyamba wonega gambe.”

Guwugedwa ga Sidhoni

²⁰ Pfhumu Nungungulu a di nyi embela, khuye:

²¹ Mwamana wa muthu, thendregedza khovbe u khedza iso si dugelelago tigoni ga Sidhoni, u va profeta,

²² u va embela, khuwe: Mune Pfhumu Nungungulu, a ngu ganela kharati, khuye: Nyi na gu wugela uwe Sidhoni, nyi na dhumiswa vbakari gwago, va na nyiti gukhavo Eni kheni Pfhumu Nungungulu, gikhati nyi na gu gu lamulago nyi wonegisa guaga gwangu.

²³ Kholu, nyi na mu rumela tungu gumogo ni novba dzindzilani gwaye, ni vale va songwago va na thegela vbakari gwaye, khu gu songetedwa khu matshari khu maphuvbo yatshavbo; va na dziti gukhavo kheni Pfhumu Nungungulu.

²⁴ Kha gu na manega gambe ndrangani ga Israyeli miba yi na gu va payago, ambari sirangalabwa nya gu va pwise wuvi, vbakari ga vaakelane va va hembululago, gambe va na dziti nya gukhavo Eni kheni Mune Pfhumu Nungungulu.

²⁵ Mune Pfhumu Nungungulu, a ngu ganela kharati, khuye: Gikhati eni nyi na tombanisago va na Israyeli khu vbakari nya mayigo va phalalegedego umo, nyi na nonedza va na Israyeli wuwadi wangu mbeli ga mambe mayigo, khavbo avbo va na bwelela tigoni gwawe, litigo nyi li ningedego ga githumi gyangu Jakobe.

²⁶ Avo va na vbanya mule na va tshulegide, va na vbaha dzinyumba dzawe ni gu yala miuvha; va na vbanya khu gurula gikhati nyi na tsayisago vaakelane vawe vatshavbo va va giredego guvivba. Khavbo avbo, avo va na nyiti gukhavo kheni Pfhumu Nungungulu wawe.