Ezekiyeli 27 - Bhibhiliya Nya Guage

Gililo khu Tiro

¹ Pfhumu Nungungulu a di nyi embela, khuye:

² “Mwamana wa muthu, gira gililo khu kotani ya Tiro.”

³ Embela Tiro, a vbanyelago masiwoni ya linene ni gu gira wugwewo ni vathu va tago khu mayigo nya sidwa nya gutale, khuwe: Mune Pfhumu Nungungulu a ngu ganela kharati, khuye: Uwe Tiro, wa gu ganela, khuwe: Wumburi wangu khwa guvbelela.

⁴ Mivbingano yago, yomo vbakari nya linene; avo va nga guvbaha, va gumburisede u vbelela.

⁵ Va girede sikhalo sago, khu mapulango nya ndziri ya Seniri; va gu resede misena ya Libhanoni, gasi guta gu girela khiyo miningwati.

⁶ Khu miguhu ya Bhasani, va gu girede khiyo makasiya; sikhalo sago, va giride khu magwaha nya dzindzofu yi namegedzedwego khu misimbo nya pinyu wu manegago gidwani gya Seniri.

⁷ Matanga yago ma di girwa khu seda nya mavalavala nya gumbure, nya gute khu tigoni ga Egipito, gasi gu gu thumela kha nga ngavbya; tshatsha wago, a diri mwendra nya giwunguwungu ni livala nya nga la damboni, si dugelago sidwani sa Elisani.

⁸ Vavbanyi va Sidhoni ni Arivhadhi a diri avo vadzuwi vago nya makasiya; vathu vago, uwe Tiro, avo va etidego khu sihevbulo, a diri va gimbidzisi nya mataro yago.

⁹ Madhota ya Gebali ni vagengeli vawe, a diri avo valulamisi vago nya dzingalava dza phwani; dzingalava dzatshavbo dza phwani; ni vagimbidzisi vaye, va di gu gira nago wugwewo.

¹⁰ Vaperesi, Validhiya, gumogo ni va na Puti, va di gu thuma kha nga masotshwa nya libutho lago; avo va di gu vbayega sitshangu sawe ni sihugu nya sikete avbo gwago; va gu mburisela khiso.

¹¹ Va na Arivhadhi ni libutho lago va di emide khu mabhiyoni gwago, khu maphuvbo yatshavbo; va na Gamati va diri khu makhokholani gwago; va vbayega sitshangu vbamabhiyotunu gwago khu maphuvbo yatshavbo; va gu mburisela u vbelela.

¹² “Tarisisi giride wugwewo nago, khu gu wona gutala nya dzithomba dzago; va di renga silo sago khu parata, gikete, thovhu ni tsumbu.”

¹³ Javani, Tubhali ni Meseki, va di gu gira nago wugwewo; va di guta sundza gwago; va gira nago wugwewo khu gu gu rengisela dzikhumbi ni sombo nya sugu.

¹⁴ Vama va Bheti-Togarima, va di renga sombo sago khu dzikavalu nya gurwale sombo, nidzo nya nyimbi gumogo ni dzimula.

¹⁵ Va na Dhedhani, a diri vagimbidzisi vago nya wugwewo; mayigo ya phwani, a diri avo va rengi vago, va gu luva khu magwaha nya dzindzofu ni mapulango nya gusivbale.

¹⁶ Siriya a di gu gira wugwewo nago khu kotani nya talo nya wutetema wago ni talo nya dzithomba dzago; avo va di gu ninga esmeralidha, siwunguwungu, myendra nya mavalavala, seda, korali, ni siwindri nya lisima nya rubi.

¹⁷ Judha ni litigo la Israyeli a diri avo varengi vago; khu thomba yago va di renga tirigu ya Miniti, dzikofetu, wulombe, mafura ni mafura nya gunungele.

¹⁸ Dhamasiko, a di gu gira wugwewo nago, khu kotani nya wutetema wago, ni talo nya dzithomba dzago, va di guta va ta renga khu vbinyu ya Helibhoni ni seda ya Sahari.

¹⁹ Dhani nuye, ni Javani, va di gu renga wugwewo wago, khu simbi yi nyiviligisidwego, kasiya ni kalamu, yi nga bani yi bela kharati wugwewoni gwago khu dhoropani ga Uzali.

²⁰ Dhedhani a di gu gira wugwewo nago, a gu rengisela myendra nya lisima nya guladze vbatshani nya dzikareta.

²¹ Arabhiya ni vafumeli vatshavbo va Kedhari, va diri mandzani gwago, va gu rengisela dzinvuta, dzihamba ni vamabhongwe.

²² Vamahungane va Sabhani ni va Rahamani, va giride wugwewo nago; khu silo sago u rengisago, avo va dita sundza silo sago, khu mafura nya gunungele, siwindri nya lisima ni ndralama.

²³ Harani, Kani ni Edheni, varengisi va Sabhani, Asuri ni Kilimadhi va giride wugwewo nago.

²⁴ Avo va di gira nago wugwewo, va gu rengisela myendra nya gumbure, myendra nya livala nya nga la damboni, dzingasa nya myendra nya lisima, na dzi hungidwe khu dzingodzi, nya gugirwe khu misena.

²⁵ Mataro ya Tarisisi ma di rwala dzithomba dzago. Khu kotani nya wugwewo wago, u khade gitetema, u manega ni ndruma nya yikhongolo vbakari nya mati ya linene.

²⁶ Vadzuwi vago nya makasiya, va gu gimbidziside khu vbatshani nya mati ya linene; aholu phuvbo ya Khugadambo, yi guvbadzulede vbakari nya mati ya linene.

²⁷ Dzithomba dzago ni mirwalo yago, ni wugwewo wago, vagimbidzisi vago nya dzingalava, a gu vanonedzi vago nya ndzila, avo va nga bani va lulamisa mataro ni varengisi vago, vadwani vatshavbo nya nyimbi, gumogo ni vatshavbo va guromo ngalavani, va na bhwabhwamela nondrwani nya yiphwa, khu litshigu nya gupfhungumudwe gwago.

²⁸ Funguni gu na ndrendremela khu ligwaha la vagimbidzisi nya nga lavayago.

²⁹ Vadzuwi vago vatshavbo nya makasiya, vagimbidzisi nya dzingalava, ni vatshavbo vanonedzi nya ndzila ya matini, va na duga khu dzingalavani gwawe vaya ema funguni.

³⁰ Va na khusedza lito va womba huwa khu wuvi wawe watshavbo, khu kotani gwago; va na phorola kudzudzwane hungoni ni gu puluwundra ngumani.

³¹ Va na vidwa likhwalo ni gu ambala silendra khu kotani gwago; va na gu lilela khu wuvi wawe watshavbo; va gira gililo nya gikhongolo.

³² Gulilani gwawe khu kotani yago, va na womba huwa na va gukhavo: Khu levbini limbe lidhoropa li fananago ni Tiro, li mbembisidwego hilo kape vbakari nya yiphwa?

³³ Gikhati dzithomba dzago dzi nga bani dzi vbagedwa khu dzingalava dziya ga mambe mayigo, u ghanyiside mayigo nya mangi; khu dzithomba dzago nya dzingi ni wugwewo wago, u ghanyiside vafumeli va mafuni.

³⁴ Gikhati, u pfhungumudwego nondrwani nya linene, wugwewo wago wu dzamide nondrwani gumogo ni vathu vago vatshavbo vbakari gwago;

³⁵ Vavbanyi vatshavbo va sidwani va di tala khu guliwuga khiso si nga gu dugelago; vafumeli vakone va tala khu rerema, dzikhovbe dzawe dzi wu na khu hwanga.

³⁶ “Vamahungane va vbakari nya mayigo, va di womba ndrodzi va samala; kholu u khade gilo nya gihegiso, u na fuva nyamba wonega gambe.”