Ezekiyeli 22 - Bhibhiliya Nya Guage

Sighoho sa Jerusalema

¹ Pfhumu Nungungulu a di nyi embela, khuye:

² “Khu guralo, uwe mwamana wa muthu, ina, u dzi emisede gulamula lidhoropa leli li vbaladzago novba, gani? Khu guralo, va gire va tugule mithumo yawe yatshavbo nya guvivbe

³ u va embela, khuwe: Pfhumu Nungungulu a ngu ganela kharati, khuye: Uwe lidhoropa u dzi girelago tsayiso wago wabune khu gu vbaladza novba vbakari gwago, ni gu dzi nyenyezisa khu gu dzi girela sifananiso u si khozela!

⁴ U dzi rwegide nandru khu kotani nya novba u wu vbaladzidego, ni gu dzi nyenyezisa khu sifananiso u dzi giredego. U dzi bweledzede hwane matshigu yago; matshigu yago nya guvbanye, ma vbohide mahegiso. Khu guralo, nyi gu giride gilo nya gihegiso ni givalo vbakari nya mayigo ni mafuni gwatshavbo.

⁵ Mayigo ya vbafuvbi, nayo ma guromo hwindzo nago, ma na gu poyila, khu gupwa ndruma nya gupwani u lidhoropa u tadego khu pfilupfilu.

⁶ Wona gukhuwe vathangeli vatshavbo va Israyeli, moyo ni moyo nya avo, gukhedza khu tshivba yaye, gimwalo gimbe va nga bani va gira, vbavbandze nya guvbaladze novba basi.

⁷ Vbakari nya vathu vago, va ngu kanyisa vababe ni vamayi, va ngu tshanisa valuveli ni gu gira wudambane ga sigulungu ni vamalile.

⁸ Khwa ninga githawo sombo sangu nya guage, u di nyenyezisa dzisabhadho dzangu.

⁹ Vbakari gwago, gu di manega vathu nya milembo, va dzi emisedego gu vbaladza novba; vbakari gwago gambe vomo va hodzago nyama nya miphaso ya musigomoni ni gu gira guvivba.

¹⁰ Vomo vale va hengelago malawu ni mayidugwane wawe ni gu hengela malawu ni nyamayi a wonago matshigu nya ngima.

¹¹ Moyo nya avo a ngu bhaya ni mwangadzi wa muakelane waye, mumbe a gira guvivba ni ngadzamwane waye, vambe va gurumedza gu hengela malawu ni ndriyaye nya nyamahegyane, gyanana gya babe waye.

¹² Vbakari nya vathu vago, vomo va dzumelago gu rengeledwa gasi gu vbaladzwa novba; va fuyariside dzitsapawu gasi gu kodza gu mana bhindzu, u kanganyisa muakelane wago khu gu mu dzegela silo saye; gambe uwe u divaledwe khu eni.” A ngu ganela Pfhumu Nungungulu.

¹³ “Wonani gukhenu nyi na tsayisa khu mandza yangu wuvafa wanu, ni wughevenga wanu, mu wu giridego vbakari gwanu.

¹⁴ Ina monyo wago wu na tiya, gani? Mandza yago ma na mana tshivba, ga matshigu eni nyi na guta gutsayisa, gani? Eni Pfhumu Nungungulu nya gu ganela, nyi na wuya nyi si gira.

¹⁵ Nyi na gu phalalegisa vbakari nya mayigo, nyi gu legalegisa vbakari nya mambe mayigo, nyi na vbedza manyala yago yatshavbo.

¹⁶ U na dzi nyenyezisa wabune mbeli ga mambe mayigo, u na dziti nya gukhuwe Eni kheni Pfhumu Nungungulu.”

¹⁷ Pfhumu Nungungulu a di nyi embela, khuye:

¹⁸ Mwamana wa muthu, ndranga ya Israyeli yi vbindrugedzide yi khala manyala avbo gwangu; vatshavbo va khade sugu, thovhu, simbi ni rikiso yi nyiviligiswago niloni; va khade manyelo nya parata.

¹⁹ Khu guralo, Mune Pfhumu Nungungulu a ngu ganela kharati, khuye: Olu enu mwatshavbo mu khadego manyelo, wonani gukhenu nyi na mi tombanisa dhoropani ga Jerusalema.

²⁰ Kha nga idzo yi wungedzedwago khidzo vbagikhotunu parata, sugu, simbi, rikiso ni thovhu, gasi gu khuthedwa nilo si nyiviligiswa, kharato nugo nyi na mi tombanisa khu likhulo ni khorodza yangu, nyi ya mi thela niloni mu nyiviligiswa.

²¹ Nyi na mi wungedzelani nyi furugedza nilo nya likhulo langu vbatshani gwanu; enu mu na nyiviliga.

²² Kharati kha nga parata yi nyiviligago vbagikhotunu, kharato nenu mu na nyiviliga vbakari gwaye, mu na dzitini nya gukhenu eni Pfhumu Nungungulu, nyi guhude likhulo langu vbatshani gwanu.”

Sighoho sa vathangeli va Israyeli

²³ Pfhumu Nungungulu a di engedza a nyi embela, khuye:

²⁴ “Mwamana wa muthu, embela Jerusalema, khuwe: Uwe u litigo li nyenyezidego, li ngamba wedwa khu ndzadzi ni gu thedwa thomwa, khu litshigu nya likhulo la Nungungulu.

²⁵ Vbakari nya vathangeli vago yomo ghudzeghudze nga nghala yi ngurangurago ya gu bani yi vbadzulela pfimba waye; avo va gu vbedza vathu; va wandra dzithomba ni sombo nya lisima, vanyamayi nya vangi va khala dzinoni vbakari gwawe.

²⁶ Vaphasi vaye nya mhamba va gu hambanisa nayo wangu, ni gunyenyezisa sombo sangu nya guage; kha va kodzi gu hambanisa igyo nya guage nigyo nya gunyenyeze, ambari gu hambanisa igyo nya gulolele nigyo nya guage, kha va khathali khu litshigu langu nya Sabhadho; khu guralo, nyi ngu nyenyeziswa vbakari gwawe.

²⁷ Dzindruna dzawe dza gu fanana ni masolwa ma vbadzulelago esi ma modego; va gu vbaladza novba, gambe va gusongetela vathu va fela bhindzu nya wudambane.

²⁸ Vaprofeti vawe va gu dzi pendra khu phembe va gu pfhadza vathu khu siwoniso nya wukanganyisi ni gu sasuledza malipha. Va ganela, khavo: Mune Pfhumu Nungungulu a ganede kharati; nari gu Pfhumu Nungungulu kha ganela gilo.

²⁹ Vathu va tigoni va gu gira dzihanyi ni wuvafa; va gutshanisa sisiwana ni vahamugi, ni gutshanisa valuveli, va si va ningi dzifanelo dzawe.

³⁰ “Nyi vbwetide vbakari gwawe mwama moyo a nga vbahago mabhiyo, a nga emago a tiya mbeli gwangu a vhikela litigo leli, gasi nyi si li khungumuli, aholu kha nya mana ni moyo.

³¹ Khu guralo, nyi na guhula likhulo langu vbatshani gwawe, va dagarela khu nilo nya khorodza yangu nya yikhongolo; va na mana tsayiso khu kotani nya satshavbo va giridego. A ngu ganela Mune, Pfhumu Nungungulu.”