Ezekiyeli 14 - Bhibhiliya Nya Guage

Tsayiso wa vale va khozelago sifananiso

¹ Madhota nya gukari ya Israyeli ma dita ma ta khala mbeli gwangu.

² Khavbo avbo, Pfhumu Nungungulu, a di nyi embela, khuye:

³ “Mwamana wa muthu, vathu vovo, myonyo yawe va yi vegide umo nya sifananiso, va vegide gikhunguvanyiso nya gunyenyeze mbeli gwawe. Ina eni nyi na va dzumela gu va nyi wudzisa, gani?”

⁴ Khu guralo, ganela navo, khuwe: Pfhumu Nungungulu wari, khuye: Ni wevbini wa na Israyeli a vegago monyo waye ga sifananiso, ni gu vega gitshunganiso nya gunyenyeze mbeli gwaye, khu hwane, a hongola ga muprofeti nya gukari aya wudzisa, eni kamwe Pfhumu Nungungulu na nyi si wone, nyi na mu phindrula gukhedza khu gutala nya sifananiso saye.

⁵ Esi nyi na si gira gasi gu wuyisela myonyo ya va na Israyeli, kholu vatshavbo va hambanide ni Eni, va landrisela sifananiso sawe.

⁶ Khu guralo, embela va na Israyeli, khuwe: Mune Pfhumu Nungungulu a ngu ganela kharati, khuye: Dzi layeni! Mu hambana ni sifananiso sanu ni gu diga mithumo yanu yatshavbo nya gunyenyeze.

⁷ Gikhati muthu nya gukari wa na Israyeli mwendro muluveli a vbanyago tigoni mule a hambanago ni eni a vega sifananiso monyoni gwaye, a vega gikhunguvanyiso nya gunyenyeze mbeli gwaye, khu hwane a hongola ga muprofeti guya nyi wudzisa, eni kamwe Pfhumu Nungungulu nyi na mu phindrula.

⁸ Nyi na dwana ni muthu yoyo, nyi mu gira giwonelo ni gilo nya gihegiso. Nyi na mu mbembisa vbakari nya vathu vangu, mu na dzitini nya gukhenu Eni kheni Pfhumu Nungungulu.

⁹ Aholu muprofeti a gu kanganyiswa, a profeta gilo nya gukari, eni kheni Pfhumu Nungungulu nyi nga phazamisago muprofeti yoyo, nyi na thawuludza gyandza gyangu nyi mu fuvisa, vbakari ga vathu vangu va na Israyeli.

¹⁰ Vatshavbo va na rwala nandru nya gughohe gwawe; gughoha ga muprofeti gu na fanana ni ga wule aya wudzisago, vatshavbo va na tsayiswa gufanane;

¹¹ gasi va na Israyeli va si hambani gambe ni Eni, ambari gu dzi nyenyezisa khu sighoho sawe, avo va na khala vathu vangu, ni Eni neni nyi na khala Nungungulu wawe; a ngu ganela Mune Pfhumu Nungungulu.

¹² Pfhumu Nungungulu a di engedza gu nyi embela, khuye:

¹³ “Mwamana wa muthu, litigo nya gukari la gu nyi ghohela khu gumba tumbega, nyi na thawuludza libogo langu nyi li dzegela guhodza, nyi li rumela ndzala, nyi songetela vathu vaye gumogo ni sirengo saye.”

¹⁴ Ambari na va khade vbakari nya litigo lile vama vava va vararu, Nowa, Dhaniyeli ni Joba, a gu vama nya gululame, va di hadza guvbulugisa womi wawe basi khu kotani nya gululame gwawe; a ngu ganela Mune Pfhumu Nungungulu.

¹⁵ Nya gu rumela sirengo nya wurena tigoni sita songetela vathu, gu khala marumbi nyamba tiyedwa khu muthu guvbindra khumo, khu gu thava sirengo sile nya wurena;

¹⁶ ambari nari gupwani va diromo tigoni mule vama vale va vararu, nyi ngu sambanya khu guvbanya gwangu; a ngu ganela Mune Pfhumu Nungungulu, avo navo na va sa kodza guvbulugisa sanana sawe nya sikhwathana mwendro nya sagadzyana. Na va dzi vbulugiside basi avo, litigo na li khade marumbi.

¹⁷ Mwendro, nya gu rumela nyimbi ga litigo lile nyi ganela, kheni: Nyimbi yi na vbindre khu tigoni mule gwatshavbo, yi songetela umo vathu ni sifuyo;

¹⁸ ambari nari gupwani va diromo tigoni mule vama vale va vararu, nyi ngu sambanya khu guvbanya gwangu; a ngu ganela Mune Pfhumu Nungungulu, na va sa dzi kodza guvbulugisa sanana sawe nya sikhwathana mwendro nya sagadzyana, aholu avo venga, khavo va nga hadza gu vbuluga.

¹⁹ Aholu nya gu rumela mitungu tigoni mule nyi guhula likhulo langu vbatshani gwaye, nyi vbaladza novba ni gu songetela vathu vaye ni sifuyo saye;

²⁰ nyi ngu sambanya khu guvbanya gwangu, a ngu ganela Mune Pfhumu Nungungulu, gukheni, ambari nari gupwani Nowa, Dhaniyeli ni Joba va diromo tigoni mule, avo na va sa dzi kodza guvbulugisa sanana sawe nya sikhwathana mwendro nya sagadzyana, aholu na va vbulugiside avo mihefemulo yawe khu kotani nya gululame gwawe.

²¹ Kholu Mune Pfhumu Nungungulu a ngu ganela kharati, khuye: “Ahati nya gu rumela sitsayiso sangu nya sina dhoropani ga Jerusalema, a gu nyimbi, ndzala, sirengo nya wurena ni mitungu, gasi guya songetela vathu vaye gumogo ni sifuyo sawe!”

²² “Aholu, gu manega va nya gukari nya mitshaledwa; sikhwathana ni sagadzyana, si na duswago umo, iso si nata gwanu, gikhati mu na wonago ndzila yawe ni mithumo yawe, mu napwa gutangadziswa khu gu alakanya guvivba nyi gu residego Jerusalema.”

²³ “ Mu na tangala khu gu wona dzindzila dzawe ni mithumo yawe; khu guralo, mu na khodwa gukhenu satshavbo nyi giridego mule, khandri nyi di gira mahala. A ngu ganela Pfhumu Nungungulu.”