Ezekiyeli 13 - Bhibhiliya Nya Guage

Gutsayiswa ga vaprofeti nya malipha

¹ Pfhumu Nungungulu a di nyi embela, khuye:

² “Mwamana wa muthu, profeta u embela vaprofeti va Israyeli va profetago olu. Embela vale va profetago khu gu si khugela, khuwe: Yingisani mahungu ya Pfhumu Nungungulu!”

³ Mune, Pfhumu Nungungulu a ngu ganela kharati, khuye: Libango ga vaprofeti nya sipumbu, va landriselago liphuvbo lawe, va ganela silo va ngamba si wona!

⁴ Uwe Israyeli, vaprofeti vago va gu fanana ni migehe yi guromo vbakari nya siwula.

⁵ Kha mwa tshikedzela malufa nya libhiyo, enu va na Israyeli gasi mu kodze gu dwana nyimbi litshiguni la Pfhumu Nungungulu.

⁶ Siwoniso sawe kha si phasi gilo, ni nyatumbatumbane wawe khwa malipha, avo va ganelago, khavo: Pfhumu Nungungulu ganede; narigu kha va rumedwa khu Pfhumu Nungungulu; khu guralo, va gu lindrela gukhavo magana yawe ma girege.

⁷ Ina khandri mwa gu wona siwoniso nyamba phasa gilo, ni nyatumbatumbane nya malipha, mwa gu ganelani, khenu: Khu Pfhumu Nungungulu a ganelago, narigu eni kha nya ganela gilo!

⁸ Khu guralo, Pfhumu Nungungulu a ngu ganela kharati, khuye: Khu kotani nya magana yanu nya wukanganyisi, ni mawonelo yanu nya malipha, nyi na mi wugela. A ngu ganela Pfhumu Nungungulu.

⁹ Gyandza gyangu gi na wugela vaprofeti va girago siwoniso nya wukanganyisi ni nyatumbatumbane nya malipha. Avo kha va na lumba huwo nya vathu vangu, kha va na lovedwa libhukuni nya vathu va Israyeli, gambe kha va na bela tigoni ga Israyeli. Khu guralo, enu mu na dzitini gukhenu Eni kheni Mune Pfhumu Nungungulu.

¹⁰ Kholu, va gu pengisa vathu vangu, va va embela, khavo: Gurude, narigu gu mwalo gurula. Vambe gu vbaha libhiyo khu maraga, vambe va gu li londra khu phembe li thega.

¹¹ Embela vale va li londrago khu phembe, khuwe: Libhiyo lolo li na thega! Gu nawa ndzadzi nya yingi, nyi na vbaladza ndzadzi nya siwindri ni gufurugedza phuvbo nya gingulu.

¹² Gikhati libhiyo li na thegago, vathu va na va wudzisa, khavo: Gomo hayini umo mu nga londrani khu phembe?

¹³ Khu kotani nya isoso, Mune Pfhumu Nungungulu, a ngu ganela kharati, khuye: “Khu likhulo langu nyi na rumela gingulu, ni guwa ndzadzi nya yikhongolo, ni gu thega maralala, gasi guta khungumula libhiyo lolo.”

¹⁴ “Nyi na khungumula libhiyo mu li londridego khu phembe; nyi li thesa vbavbatshi. Nyi na li gira li thega vbatshani gwanu mufa mwatshavbo, khavbo mu na nyitigo gukhenu, kheni Pfhumu Nungungulu.”

¹⁵ “Nyi na ladza likhulo langu vbatshani nya libhiyo ni vbatshani ga vale va li londridego khu phembe. Nyi na mi embelani gukheni: “Gu mwalo gambe libhiyo, ambari ni vale va li londridego,

¹⁶ a gu vaprofeti va Israyeli, va nga bani va profeta khu Jerusalema, va diri ni siwoniso nya gukhavo gomo gurula, narigu gu mwalo gurula; a ngu ganela Mune Pfhumu Nungungulu.”

Gitiviso ga vaprofeti nya malipha

¹⁷ Gasi olu, uwe mwamana wa muthu, thendregedza u khedza vanyamahegyane va vathu vago va profetago iso va si pimisago khu myonyoni gwawe. Profeta gwawe, u va embela, khuwe:

¹⁸ “Mune Pfhumu Nungungulu a ngu ganela kharati, khuye: Libango ga vanyamayi va sonago sithungulu nya wuloyi mawogoni gwawe, va gira sikhongelo nya mipimo nya guhambanelane gasi gu dembela mihefemulo ya vathu vangu. Ina mwa gu pimisa gukhenu, khu gu dembela mihefemulo ya vathu vangu, mu na vegedza mihefemulo yanu, gani?

¹⁹ Enu mu nyi ghohede vbakari ga vathu vangu, mu girela gu mana dzitshotanyana nya sivbila ni sipandryana nya gibaba, gasi gu songani mihefemulo yi ngamba yela gu songwa, mu vegedza mihefemulo yi gu mwalo fanelo nya guvbanye, mu liphela kharati vathu vangu va yingisa malipha yanu.”

²⁰ Khu kotani nya isoso, Mune Pfhumu Nungungulu, a ngu ganela kharati, khuye: “Nyi ngu wugela sithungulu sanu nya wuloyi, iso mu molago khiso vathu vangu gukhwatshi mwa gu mola sinyoni,

²¹ nyi na pferula sikhongelo sanu, nyi tshula vathu vangu mandzani gwanu, avo kha va na modwa gambe khu tshivba yanu. Khavbo mu na dzitigo gukhenu Eni kheni Pfhumu Nungungulu.

²² Khu malipha yanu mu tshunganiside wongo wa muthu nya gululame, a diga gu gira gugola gwangu, mu tiyisela vathu nya guvivbedwe khu myonyo, va si digi dzindzila dzawe nya guvivbe gasi guvbulugisa womi wawe.

²³ Khu kotani nya isoso, kha mu na mana gambe siwoniso nya malipha, gima kha mu na gira gambe wuprofeti. Nyi na tshudzisa vathu vangu mandzani gwanu. Khavbo mu na dzitigo gukhenu Eni kheni Pfhumu Nungungulu.”