Ezekiyeli 12 - Bhibhiliya Nya Guage

Wugumbi giyeyedzo nya sighoho

¹ Pfhumu Nungungulu a di nyi embela, khuye:

² “Mwamana wa muthu, uwe wa gu vbanya vbakari nya vathu nya gukanyise, avo va na ni maho gasi gu wona, aholu kha va woni; ni dzindzeve gasi gupwa, aholu kha vapwi, khu guralo, vathu nya gukanyise.

³ Gasi, olu, uwe mwamana wa muthu, dongisela rwalo wago u hongola guvbagedwatunu, u ya wonana ni vatshavbo gipimo nya litshigu rumba, u hambana navo, u hongola wumbe wulanga. A gu dzina saye va na si wona, ambari a gu vathu nya gukanyise.

⁴ Dusa mirwalo yago vbavbandze gu ngari mihani nu gu wonwa khu vathu, gasi uwe u na khuga vbasilambotunu na va gu gu wona, kha nga wule a rurago a hongola ga limbe litigo.

⁵ Pola gihogo vbalibhiyotunu na va gu gu wona, u dusa khavbo rwalo wago.

⁶ Wu vbagare vathu vatshavbo na va gu gu wona, u wu rwala na li gu pfola lidambo. Fenengedza khovbe yago gasi u si woni gilo gya tigoni, kholu, eni nyi giride khu uwe giyeyedzo ga vathu va Israyeli.”

⁷ Eni nyi di gira iso nyi nga leletedwago. Litshigu latshavbo nyi di dusa vbavbandze sombo sangu, nyi si dongisedego gukhwatshi khu vale va hongolago guvbagedwatunu. Khu hwane, nyi di pola gihogo khu mandza yangu vbalibhiyotunu. Na lipfode lidambo, nyi di duga ni rwalo wangu na nyi wu vbagaride nyi na gu wonwa khu vathu vatshavbo.

⁸ Na gugide, Pfhumu Nungungulu a di nyi embela, khuye:

⁹ “Mwamana wa muthu, olu vathu vale nya gukanyise va Israyeli, va phedego gu wudzisa, gukhavo: Ginani u girago?”

¹⁰ Va embele gukhuwe: Mune Pfhumu Nungungulu a ngu ganela kharati, khuye: Rwalo watshavbo yoyu wa guya ga muthangeli wa Jerusalema, ni ga vathu vatshavbo va Israyeli va guromo mule.

¹¹ Va embele khuwe eni kheni giyeyedzo gwanu. Kha nga iso nyi giridego, va na girwa navo kharato. Avo va na yiswa wugumbini kha nga sibotshwa.

¹² Muthangeli wawe a na vbagara rwalo waye vbasilambotunu, a duga khu gihogo gi na podwago vbalibhiyotunu gasi gu a duga khavbo. Uye a na fenengedza khovbe yaye gasi a si woni gilo gya tigoni.

¹³ Nyi na thawuludza ligoga langu vbatshani gwaye, uye a na modwa khu lizinga langu; Eni nyi na mu yisa Bhabhiloni, tigoni nya Vakalidhiya, aholu uye kha na li wona, a naya fela iyoyo.

¹⁴ Vaakelane vaye vatshavbo va na tago guta mu phasedzela, ni masotshwa yaye yatshavbo, nyi na va lundra khu maphuvbo yatshavbo, na nyi pharide litshari mandzani.

¹⁵ Khu kharati, va na dziti gukhavo kheni Pfhumu Nungungulu, gikhati nyi na gu va phalalegisago vbakari nya mifumo, va legalega ni mayigo.

¹⁶ “Aholu, nyi na tsetsa vadugwana vawe gu va songa khu litshari, ndzala ni mitungu, gasi va rwale guvivba gwawe gwatshavbo ga mayigo va na hongolago. Khavbo avbo, va na dzitigo gukhavo kheni Pfhumu Nungungulu.”

¹⁷ Khavbo avbo, Pfhumu Nungungulu a di nyi embela, khuye:

¹⁸ “Mwamana wa muthu, u na ndrendremela nu gu hodza, u tala khu hwanga gikhati u selago mati yago.

¹⁹ Embela vathu va tigoni, khuwe: Mune Pfhumu Nungungulu, a ngu ganela kharati ga vathu vale va vbanyago Jerusalema ni Israyeli, khuye: Va na hodza na vari ni wugara, va sela mati na va vbede tshivba, kholu satshavbo si guromo tigoni gwawe si na wandrwa khu kotani nya dzihanyi dza vatshavbo va vbanyago mule.

²⁰ Madhoropa ma khadwago khu vathu ma na khala marumbi, ni litigo li na khala giwula. Khu guralo, mu na dzitini gukhenu eni kheni Pfhumu Nungungulu.”

²¹ Pfhumu Nungungulu ganede kharati, khuye:

²² “Mwamana wa muthu, mavingu muni enu mu gu nawo tigoni ga Israyeli nya gukhenu: Matshigu ma ngu vbindra, ni siwoniso va hi wonisago, kha si phasi gilo?

²³ Va embele, khuwe: Mune Pfhumu Nungungulu a ngu ganela kharati, khuye: Nyi na vbedza mavingu yoyo, kha ma na ganedwa gambe tigoni ga Israyeli. U va embela gambe, khuwe: Gu ngu vboha matshigu siwoniso satshavbo si na giregago.

²⁴ Kholu, kha gu na manega gambe siwoniso nya malipha, mwendro nyatumbatumbane nya wukanganyisi, vbakari ga va na Israyeli.

²⁵ Kholu eni Pfhumu Nungungulu nyi na ganela iso nyi si golago, gambe isoso si na girega nyamba hwela. Kholu matshiguni yanu, enu vathu nya gukanyise, nyi na landrisa satshavbo iso nyi nga ganelago. A ngu ganela Mune Pfhumu Nungungulu.”

²⁶ Pfhumu Nungungulu a di engedza a nyi embela, khuye:

²⁷ Mwamana wa muthu, va na Israyeli va gu ganela, khavo: Giwoniso va gi wonago kha gi na girega nugunugu, gi na girega khu hwane nya myaga yi nga gutago.

²⁸ Khu guralo, va embele, khuwe: Mune Pfhumu Nungungulu, a ngu ganela kharati, khuye: “Ni limwedo nya magana yangu kha li na nga hwela; satshavbo nyi nga ganelago si na girega. A ngu ganela Mune Pfhumu Nungungulu.”