Ezekiyeli 10 - Bhibhiliya Nya Guage

Giwoniso nya wuvili nya dzikerubhimi

¹ Nyi di khusa maho nyi khedza vbatshani nya langwe, nyi wona gilo nya gufanane ni giwindri nya safira gi nga bani giromo vbatshani nya mihungo nya dzikerubhimi, na gi gu fanana ni gikhalo nya wufumu.

² Pfhumu Nungungulu a di embela mwama nya guambale dzingandzu nya seda, khuye: “Gimbila khu vbakari ni vbakari nya marodha, khu vbavbatshi nya dzikerubhimi. Tadza mandza khu magala nya nilo u ma dzegidego vbakari ni vbakari nya dzikerubhimi, u ma swaya dhoropani.” Uye a di bela na nyi gu mu wona.

³ Khu guralo, dzikerubhimi dzi di bani dzi romo khu phuvbo ga nyamudye nya Nyumba ya Nungungulu, gikhati mwama a bedego, lipfhi li di tadza likupakupa la ndrani.

⁴ Khu guralo, wudhumo wa Pfhumu Nungungulu wu di duga khu vbatshani nya dzikerubhimi wu ya ema vbamwanyatunu nya Nyumba ya Nungungulu. Lipfhi li di tadza Nyumba ya Nungungulu, ni likupakupa li di manwa khu gungangamela nya wudhumo wa Pfhumu Nungungulu.

⁵ Ligwaha nya mambapi nya dzikerubhimi, li di pwala kala likupakupani la vbavbandze, kha nga lito la Pfhumu Nungungulu nya Tshivba Yatshavbo, gikhati a ganelago.

⁶ Gikhati Pfhumu Nungungulu a leletelago mwama nya guambale dzingandzu nya seda, khuye: “Dzega nilo wa vbakari ni vbakari, nya marodha nya dzikerubhimi,” mwama a di hongola aya ema khu phuvbo nya lirodha.

⁷ Khu vbakari nya nilo wu nga bani wu romo khu vbakari ni vbakari nya dzikerubhimi, mweyo nya idzo yi di khusedza mandza, yi vbala magala nya nilo, yi ma thela mandzani ga mwama nya guambale dzingandzu nya seda, uye a di ma dzega a duga vbavbandze.

⁸ Avbo nya dzikerubhimi gu di wonega gukhwatshi libogo nya muthu li guromo khu vbavbatshi nya mambapi yawe.

⁹ Nyi di khedza nyi wona vbafuvbi ni dzikerubhimi marodha mana, limwedo khu phuvbo ga likherubhimi ni likherubhimi; marodha ma di khedziga gu fanana ni giwindri nya lisima.

¹⁰ Gasi khu giemo gyawe ma di gu fanana, limwedo ni mwedo li di ya patana ga limbe;

¹¹ ma gu bani ma gimbila, ma di gu gimbila khu maphuvbo yawe ya mana, ma di si dzundrulugi gu gimbilani gwawe. Ni evbini hungo waye wu khedzago, khiyo ma nga bani ma gimbilela iyo; ma di si phawugi gu gimbilani gwawe

¹² Givili gyawe gupata ni makosi, mandza ni mambapi si di tade khu maho, gu fanana ni marodha yawe nya mana.

¹³ Gasi marodha yale, ma di ranwa gupwani, marodha nya gudzundrulugele.

¹⁴ Likherubhimi limwedo ni limwedo li diri ni dzikhovbe dzina; khovbe nya likerubhimi nya guhegule a diri ya likherubhimi; khovbe nya wuvili yi di gu fanana ni khovbe nya muthu; nya wuraru yi di gu fanana ni khovbe nya nghala; nya wu na yi di gu fanana ni khovbe nya lighama.

¹⁵ Khavbo avbo, dzikerubhimi dzi di khusega dziya vbatshani. A diri sirengo sa simweso nya guvbanye nyi si wonidego vbafuvbi ni tsongo wa Kebhari.

¹⁶ Gikhati dzikerubhimi dzi gimbilago, marodha ma di gimbila nayo; gikhati dzikerubhimi dzi tulago mambapi gasi guvbuvba, marodha ma di hongola nayo.

¹⁷ Gikhati dzikerubhimi dzi emago, marodha nayo ma di ema; gikhati dzikerubhimi dzi khugegago, marodha nayo, ma di khugega, kholu liphuvbo nya sivangwa nya guvbanye li diri ga idzo.

Wudhumo wa Nungungulu wu ngu diga Nyumba ya Nungungulu

¹⁸ Khu guralo, wudhumo wa Pfhumu Nungungulu wu di duga vbanyangwatunu nya Nyumba ya Nungungulu wu ta ema vbatshani nya dzikerubhimi.

¹⁹ Na nyi nga gu khedzisisa, dzikerubhimi dzi di thawuludza dzimbapi dzi vbuvba, marodha nayo ma di hongola gumogo nadzo. Dzikherobhimi dzi di ya ema vbanyangwatunu nya mwanya wa Khugadambo nya Nyumba ya Pfhumu Nungungulu, ni wudhumo wa Nungungulu wa Israyeli, wu diri vbatshani gwawe.

²⁰ Sivangwa sesi, a diri iso sa simweso nyi si wonidego vbavbatshi ga Nungungulu wa Israyeli, bambe nya tsongo wa Kebhari, nyi di wona gukheni iso a diri dzikerubhimi.

²¹ Mweyo ni mweyo, yi diri ni dzikhovbe dzina ni mambapi mana, khu vbavbatshi nya mambapi, gu diri ni mandza nya gufanane ni ya muthu.

²² Dzikhovbe dzawe dzi di fanana ni dzile nyi dzi wonidego bambe nya tsongo wa Kebhari. Dzikhovbe dzawe dzatshavbo dzi di gimbila guya mbeli gikhati gyatshavbo.