Ezekiyeli 1 - Bhibhiliya Nya Guage

Giwoniso nya guphele nya dzikerubhimi

¹ Khu litshigu nya livbandre, nya ngima nya wu na, nya mwaga nya magumararu, eni nyi diri vbakari ga vale va vbagedwego, vbafuvbi ni tsongo wa Kebhari, gu di tulega ndzadzini, nyi di wona siwoniso khu ga Nungungulu.

² Khu litshigu nya livbandre nya ngima nya wu na, nya mwaga nya livbandre nya guvbagedwe ga mufumeli Jowakimi.

³ Magana ya Pfhumu Nungungulu ma dita ga muphasi nya mhamba Ezekiyeli, mwamana wa muphasi nya mhamba Bhuzi, vbafuvbi ni tsongo wa Kebhari, tigoni gwa Vakalidhiya. Avbovbo, gyandza gya Pfhumu Nungungulu gi diromo gwaye.

⁴ Nyi di khedza nyi wona gingulu gi nga bani gi guta khu Wuronga; lipfhi nya likhongolo, na liri ni nilo nya wukhongolo wu nga bani wu wenengedza malangani gwatshavbo, gu duga khu vbakari gwaye, gilo nya dzisimbi nya gukhedzige gi nga bani gi duga khu vbakari nya nilo.

⁵ Khu vbakari gwaye, gu di gu duga silo nya gufanane ni sivangwa sina nya guvbanye. Khu giemo si di fanana ni muthu,

⁶ aholu gimwegyo ni gimwegyo nya iso gi diri ni dzikhovbe dzina ni mambapi mana.

⁷ Mawundru yaye ma di lulamide, ni migondro yaye yi fanana ni sitsendro nya gimombyana yi khedziga gu fanana ni sugu nya guguhwe.

⁸ Khu vbavbatshi nya mambapi yaye, khu maphuvbo ya mana, iso si diri ni mandza nya gufanane ni ya muthu. Khu guralo, satshavbo nya sina si diri ni dzikhovbe ni mambapi yawe.

⁹ Dzimbapi dzawe dzi di yingana, mweyo ga yimbe. Sivangwa sisi si di gimbila guya mbeli, nyamba thendregedza.

¹⁰ Gasi khu makhalelo nya dzikhovbe dzawe, sa sina, dzi di gu fanana ni khovbe nya muthu, khu mbeli; khu phuvbo ga nyamudye, satshavbo sa sina si diri ni khovbe nya nghala, khu phuvbo ga nyambade si diri ni khovbe nya mombe, satshavbo sa sina, si diri gambe ni khovbe nya lighama khu hwane.

¹¹ Dzikhovbe dzawe ni mambapi dzawe, si di hambanisidwe khu vbatshani, gimwegyo ni gimwegyo gi diri ni mambapi mavili, na ma yinganide limwedo ga limbe, mambapi ya mavili, dzi di gu fenengedza sivili dzaso.

¹² Gimwegyo ni gimwegyo nya iso, gi di gu gimbila gikhati gyatshavbo guya mbeli. Avbo Liphuvbo liyago, iso niso si diya umo, si di si thendregedzi gikhati si gimbilago.

¹³ Sivangwa nya guvbanye si di fanana ni magala nya nilo; gu fanana ni myenge. Nilo wu di gu gimbilagimbila maphuvbo yatshavbo khu vbakari nya sivangwa nya guvbanye, gambe, gu di gu dzuma mabara ni gulasa.

¹⁴ Sivangwa sile nya guvbanye, si di tutuma-tutuma, gu fanana ni nyangafula.

¹⁵ Na nyi nga gu si khedza, nyi di wona lirodha mafuni vbafuvbi nya girengo ni girengo, na liri mbeli nya dzikhovbe dzawe dza dzina.

¹⁶ Makhalelo nya marodha yoyo, ni magirelo yaye, ma di gu fanana ni Tarisisi nya gukhedzige; sa sina si diri ni giemo nya gufanane. Ni makhalelo yawe ma di gira kha nga khwatshi lirodha limwedo li guromo vbakari ga limbe lirodha.

¹⁷ Avbo ma nga bani ma gu gimbila, ma di gimbila khu maphuvbo yawe ya mana; aholu ma di si thendregedzi gikhati ma gimbilago.

¹⁸ Marodha yoyo, ma di laphide guya vbatshani, ma di gu thavisa ngudzu; ma di tade khu maho maphuvbo yatshavbo.

¹⁹ Gikhati sivangwa nya guvbanye si gimbilago, marodha nayo ma di landrisela; gikhati si khugegago, marodha nayo ma di khugega.

²⁰ Iyo Liphuvbo li nga bani li guya iyo, sivangwa nya guvbanye niso, si diya iyo, marodha ma di landrisela khu hwane, kholu Liphuvbo la limwedo li diri gwawe.

²¹ Gikhati sivangwa nya guvbanye si gimbilago, marodha nayo, ma di gimbila; gikhati si emago, ayo nayo ma di ema; gikhati sivangwa nya guvbanye si khusegago, marodha nayo ma gu khusega gumogo naso, kholu Liphuvbo la limwedo li diromo gwawe.

²² Vbatshani nya mihungo nya sivangwa nya guvbanye, gu di gu wonega gilo nya gufanane ni giseketelo nya litigo, nya guage ngudzu nya gukhedzige ni guthisa, na gi ladzidwe vbatshani nya mihungo yawe.

²³ Khu vbavbatshi nya giseketelo, gu diromo dzimbapi na dzi ladzide, dzi khugega dzi khuhana, gimwegyo ni gimwegyo, gi diri ni dzimbapi dzimbili dzi nga bani dzi fenengedza givili khu phuvbo, mweyo nya idzo yi diri ni dzimbe dzimbili dzi nga bani dzi fenengedza limbe liphuvbo.

²⁴ Nyi dipwa ligwaha nya dzimbapi dzawe, gikhati si nga bani si gu vbuvba. Gu di fanana ni ligwaha nya mati nya mangi, gu fanana ni lito la Pfhumu nya Tshivba Yatshavbo. A diri ligwaha nya guthise, nya gufanane ni ligwaha nya libutho nya masotshwa. Gikhati si emago si di neredza mambapi yawe.

²⁵ Khu guralo, khu vbatshani nya mihungo yawe, gu di pwala lito nya likhongolo, gikhati si emago si di neredza mambapi yawe.

²⁶ Khu vbatshani nya rodha nya mihungo yawe, gu diromo gilo nya gufanane ni gikhalo nya wufumu nya gukhedzige nga giwindri nya safira; khu vbatshani nya igyo nya gufanane ni gikhalo nya wufumu, gu diromo gilo nya gufanane ni muthu khu vbatshani gwaye.

²⁷ Nyi di gi wona nga simbi nya gukhedzige, nya gufanane ni nilo wu randredego gukhugela vbatshani kala giwununi gwaye, na wu randrede mili waye; gukhugela giwununi gwaye kala vbavbatshi; nyi di wona kha nga nilo ni gungangamela gu mu randredego.

²⁸ Gu di gira kha nga khwatshi wulaho wa nyazimu mapfhini litshigu nya guwe ndzadzi, gu diri kharati gungangamela gu nga bani gu mu randrede. Igyogyo a diri gilo nya gufanane ni wudhumo wa Pfhumu Nungungulu. Gikhati nyi nga wu wona, nyi di thega khu khovbe vbavbatshi, gambe nyi dipwa lito nya muthu nya gukari na gu ganela.