Ekisodha 40 - Bhibhiliya Nya Guage

Gukhangudwa nya Wulanga nya Guage

¹ Pfhumu Nungungulu a di ganela gambe ga Mosi, khuye:

² “Khu litshigu nya guphele nya ngima nya guhegule, u na tsitsa wulanga nya guage nya Tshatsha nya Tshangano.”

³ U na vega umo Ngasa nya Gidzumeledzwano, u sega mwanya wakone khu mwendra.

⁴ U na bedza meza u dongisela sombo saye satshavbo khu edzi gu vbwetegago khidzo; u na bedza gidzigaredzo nya dzikandriya, u khondrisa dzikandriya dzaye.

⁵ U na vega wulangani gwaye giluvelo nya ndralama nya guningele avbo libani, mbeli nya Ngasa nya Gidzumeledzwano, u gira mwendra nya makhuvi mwanyani nya wulanga nya guage.

⁶ U na vega giluvelo nya miphaso nya guvbiswe mbeli nya mwanya nya wulanga nya guage nya Tshatsha nya Tshangano.

⁷ U na vega ginamelo vbakari nya Tshatsha nya Tshangano ni giluvelo, u thela mati ginameloni.

⁸ U na bhiya likupakupa maphuvbo yatshavbo u vega mwendra nyangwatunu nya likupakupa.

⁹ U na dzega mafura nya gutodze u todza wulanga nya guage ni satshavbo si manegago umo; u na agisa ni sombo saye satshavbo, gu khala wulanga wu agidego.

¹⁰ U na todza giluvelo nya miphaso nya guvbiswe ni sombo saye satshavbo; u na agisa giluvelo; ni giluvelo gi na khala wulanga nya guage ngudzu.

¹¹ Khavbo avbo, u na todza ginamelo ni girandro gyakone gasi gu gi agisa.

Guwumbedwa ga vaphasi nya mhamba

¹² U na hidzimisa Aroni ni sanana saye kala vbamwanyatunu nya Tshatsha nya Tshangano, u va handza khu mati.

¹³ U na ambagisa Aroni dzingandzu nya miphaso; u mu todza, u mu agisa gasi gu mu wumbela thumoni nya wuphasi nya mhamba mbeli Gwangu.

¹⁴ U na hidzimisa niso sanana saye u ta si ambagisa dzingandzu nya wuphasi nya mhamba.

¹⁵ U na si todza nga idzo u nga todzago khidzo babe wawe, gasi va thuma thumo nya wuphasi nya mhamba mbeli gwangu. Gutodzwa gogu gu na va wumbela wuphasi nya mhamba kala gupindruga, ga situgulwana ni situgulwana.

¹⁶ Mosi a di gira satshavbo kha nga idzo Pfhumu Nungungulu a nga rumago khidzo.

Gutsitswa nya Wulanga nya Guage

¹⁷ Khu litshigu nya guhegule nya ngima nya guphele nya mwaga nya wuvili, wu di tsitswa Wulanga nya Guage.

¹⁸ Mosi a di tsitsa Wulanga nya Guage, a di vega siseketelo, mapulango ni mitalatsi a gu emisa madingo;

¹⁹ a di thawuludza Tshatsha, va gu pfhulela Wulanga nya Guage nya nga idzo a nga rumago khidzo Pfhumu Nungungulu.

²⁰ A di dzega siwindri nya gidzumeledzwano a si vega ndrani nya Ngasa; a bedza mipingo avba nya Ngasa, khu vbatshani nya Ngasa a di handzega Gikhalo nya Ditshedzo.

²¹ Va di rwala ngasa va gu yi bedza wulangani nya guage, va vbayega myendra nya makhuvi, gasi gu bhiya Ngasa nya Gidzumeledzwano kha nga idzo Pfhumu Nungungulu a nga mu leletelago khidzo Mosi.

Mavegedzelelo nya sombo ndrani nya Tshatsha

²² A di vega gambe meza Tshatshani nya Tshangano khu phuvbo ga Wuronga nya Wulanga nya Guage, vbavbandze nya mwendra nya makhuvi.

²³ A gu sasamedzela sibaba vbamezatunu, mbeli ga Pfhumu Nungungulu, gulandra khu ndzila yakone edzi a rumidwego khidzo Mosi khu Pfhumu Nungungulu.

²⁴ A di vega gidzigaredzo nya dzikandriya ndrani nya Tshatsha nya Tshangano, khu mbeli nya meza, khu phuvbo ga Marandzi nya Wulanga nya Guage.

²⁵ A di dongisela dzikandriya mbeli ga Pfhumu Nungungulu, kha nga idzo a leletedwego khidzo Mosi khu Pfhumu Nungungulu.

²⁶ A di vega giluvelo nya ndralama Tshatshani nya Tshangano mbeli nya mwendra nya makhuvi.

²⁷ Khavbo avbo, a di vbisa libani nya gunungele kha nga idzo a nga leletedwago khidzo Mosi khu Pfhumu Nungungulu.

²⁸ A di vbayega gambe mwendra nyangwatunu nya Wulanga nya Guage.

²⁹ A di vega giluvelo nya miphaso nya guvbiswe nyangwatunu nya Wulanga nya Guage, nya Tshatsha nya Tshangano, a gu gira miphaselo nya guvbiswe ni wuguvbi vbatshani nya giluvelo, kha nga idzo Pfhumu Nungungulu a nga leletelago khidzo Mosi.

³⁰ A di vega ginamelo vbakari nya Tshatsha nya Tshangano ni giluvelo, a thela umo mati nya guhambe khayo.

³¹ Mosi ni Aroni ni sanana saye va di hamba umo mandza ni migondro.

³² Gikhati gyatshavbo va belago Tshatshani nya Tshangano ni gu hidzimela vbagiluvelotunu, va di hamba mandza ni migondro, kha nga idzo Pfhumu Nungungulu a leletedego khidzo Mosi.

³³ Khu guhegisa, a di tsitsa libhiyo nya likupakupa li dzuwuluga Wulanga nya Guage ni giluvelo, Mosi a di vbayega mwendra nya makhuvi nya gusege mwanya nya likupakupa, a vbedzisa kharati thumo waye watshavbo.

Lipfhi li ngu fenengedza Wulanga nya Guage

³⁴ Khavbo avbo, lipfhi li di fenengedza Tshatsha nya Tshangano, wudhumo wa Pfhumu Nungungulu wu di tadza Wulanga nya Guage.

³⁵ Mosi a di si dzi kodzi gambe gu bela Tshatshani nya Tshangano, kholu lipfhi li di fenengedzide vbatshani nya tshatsha, ni wudhumo wa Pfhumu Nungungulu wu di tadzide Wulanga nya Guage.

³⁶ Gikhati lipfhi li khugago vbatshani nya Wulanga nya Guage, sanana sa Israyeli si di bela ndzilani si simama ni lendro lawe.

³⁷ Aholu lipfhi la gumba khuga, avo navo va di si khugi, kala gikhati li khugago lipfhi.

³⁸ Kholu mihani yile lipfhi la Pfhumu Nungungulu li di fenengedza Wulanga nya Guage, wutshiguwule nilo wu di wenengedza khavbo nya lipfhi, vbakari nya ndranga yatshavbo ya na Israyeli, lendroni gwawe gwatshavbo.