Ekisodha 39 - Bhibhiliya Nya Guage

Guambala ga vaphasi nya mhamba

¹ Khu mwendra nya livala nya nga la damboni, ni giwunguwungu, ni guvbyuga, va di gira dzingandzu nya miphaso gasi gu dzi thumisa nyumbani nya guage. Va di gira gambe dzingandzu nya guagiswe dza muphasi nya mhamba Aroni, kha nga edzi Pfhumu Nungungulu a nga leletela khidzo Mosi.

Efodhe

² Va di gira efodhe nya ndralama, nya mwendra nya livala nya nga la damboni, nya giwunguwungu, nya guvbyuge ni linyu nya gulugwe.

³ Va di pfhula ndralama va yi ladza va yi kwaya yi khala dzingodzi va dzi lugela ni mwendra nya livala nya nga la damboni, ni giwunguwungu, ni guvbyuga ni linyu nya wuzundzo va lugela khu wumeseri ni wugengeli.

⁴ Va di vega dzingodzi dzimbili dza magatani dzitshokha dzakone dzi hungana mahegiso.

⁵ Keka wakone wu hungago ni gu tiyisa efodhe wulugedwa idzosaye; khu ndralama ni mwendra nya livala nya nga la damboni, ni giwunguwungu, ni guvbyuga ni dzikhindra nya linyu, kha nga idzo Pfhumu Nungungulu a nga rumelago khidzo Mosi.

⁶ Va di namegedzela siwindri nya lisima nya onikisi ni sikhweletedzo nya ndralama, na va lovide malina nya sanana sa Israyeli, khu gu bethedwa vbasiwindritunu kha nga idzo va lovago khidzo avbo nya phera nya gifungo.

⁷ Si di vegedzwa gwadi magatani nya efodhe, kha nga siwindri nya gialakanyiso nya sanana sa Israyeli, kha nga idzo Pfhumu Nungungulu a nga leletelago khidzo Mosi.

Gikhweso gya vbakhanatunu

⁸ A di lugela gambe gikhweso gya vbakhanatunu “thumo nya wumeseri” kha nga Efodhe: Khu ndralama ni mwendra nya livala nya nga la damboni, ni giwunguwungu, ni guvbyuga ni linyu nya gulugwe.

⁹ Gi diri ni maphuvbo mana nya idzosaye, na gi petidwe, na giri ni pimo nya gyandza gulapha ni gyandza guanama.

¹⁰ Va di sasamedzela avbo ndzarara dzina nya siwindri nya lisima a gu edzi: Ga ndzarara nya guhegule va di namega rubi, topaziyo, karibhukulu ni korinalina;

¹¹ ga ndzarara nya wuvili, esmeralidha ni safira ni dhayimane;

¹² ga ndzarara nya wuraru va di namega opala, agata ni ametista;

¹³ ga eyi nya wu na, krizolito, onikisi ni jaspe. Siwindri sesi satshavbo si di namegedzedwa malangani yawe khu ndralama.

¹⁴ Siwindri sesi nya likhumi na sivili si vegidwe khu gulandrelana nya malina nya sanana sa Israyeli, avba nya giwindri ni giwindri gu lovidwe lina limwedo nya aya nya likhumi na mavili mahundzu khu gu bethwa kha nga idzo va lovago khidzo avba nya phera nya gifungo.

¹⁵ Va di gira gambe dziketane nya ndralama nya guhutwe, dzi vborwa kha nga dzingodzi gasi gu hunga gikhweso gya vbakhanatunu.

¹⁶ Va di gira gambe sikhweletedzo sivili nya ndralama ni masindra mavili nya ndralama ma vegwa dzikhonani dza dzimbili nya gikhweso gya vbakhanatunu.

¹⁷ Va di vbulela dzingodzi nya ndralama umo nya masindra ya mudzikhonani nya gikhweso gya vbakhanatunu.

¹⁸ Dzimbe dzitshoka nya dzingodzi dzi di hungwa omu nya sikhweletedzo dzi ta mola avba nya magata nya efodhe khu mbeli gakone.

¹⁹ Va di gira gambe masindra mavili nya ndralama va vega mahegiso nya dzikhona dza dzimbili nya gikhweso khu phuvbo ga ndrani gu kuhanago ni efodhe.

²⁰ Va di gira mambe masindra mavili nya ndralama ma gu sonedwa vbamagatatunu ya mavili nya efodhe, khu phuvbo ga vbavbandze avba dzi ta tshanganago vbakekatunu nya efodhe.

²¹ Va di hunga gikhweso gya vbakhanatunu, va hunga masindra yaye avbo nya aya nya efodhe khu ngodzi nya gulugwe khu dzikhindra mwendra nya livala nya nga la damboni, gasi gu tiyisa gikhweso gya vbakhanatunu vbatshani nya keka nya efodhe, gi fela gumba hanahana, kha nga idzo Pfhumu Nungungulu a nga leletelago khidzo Mosi.

Gifenengelo ni ngandzu

²² Va di gira gifenengelo nya efodhe, gi lugidwego gyatshavbo khu mwendra nya livala nya nga la damboni.

²³ Gifenengelo gi di podwe vbakari gukhwatshi thamo nya gikatawu na gi tiyisidwe dzuwulugo watshavbo gasi gi si pferugi.

²⁴ Va di mburisela dzibambe nya gifenengelo khu maroma nya gugirwe khu mwendra nya livala nya nga la damboni ni giwunguwungu ni guvbyuga dzuwulugo watshavbo khu dzikhindra nya gumbure.

²⁵ Va di gira nyangendre nya ndralama nya guhutwe, va hungelela gimwegyo ni gimwegyo vbakari nya maroma, khu mahegiso gulandra dzuwulugo watshavbo nya gifenengelo.

²⁶ Si di ningedzana, liroma ni nyangendre, nyangendre ni liroma, gulandra dzuwulugo watshavbo nya gifenengelo nya thumo nya wukhozeli, kha nga idzo Pfhumu Nungungulu a nga leletelago khidzo Mosi.

²⁷ Va di gira gambe dzingandzu dza Aroni ni sanana saye, dzingandzu dzodzo dzi di lugwa khu linyu nya wuzundzo nya gulugedwe,

²⁸ gihugu nya linyu nya wuzundzo, sihugu nya sidugwane nya thumo nya wukhozeli ni sikhunyula nya linyu nya wuzundzo,

²⁹ ni keka nya dzingodzi nya linyu nya wumburi ni mwendra nya livala nya nga la damboni, nya giwunguwungu, nya guvbyuge, wu lugidwego khu wumeseri kha nga idzo Pfhumu Nungungulu a nga leletelago khidzo Mosi.

³⁰ Va di gira libhareti nya ndralama nya guhutwe; va li namega vbagihugutunu nya guagiswe; va lova vbalibharetitunu nya ndralama khu gukenya, kha nga idzo va lovago khidzo vbapheratunu nya gifungo, khavo: “A phasedwego Pfhumu Nungungulu.”

³¹ Va di li hunga khu ngodzi nya mwendra nya livala nya nga la damboni mbeli nya gihugu khu vbavbatshi gakone, gasi gu mola libhareti kha nga edzi Pfhumu Nungungulu a nga leletago Mosi.

Vameseri va ngu bikela thumo ga Mosi

³² Khu kharati, va di vbedza thumo watshavbo nya guvbahe Wulanga nya Guage, Tshatsha nya Tshangano; sanana sa Israyeli si thumide satshavbo esi Pfhumu Nungungulu a leletedego Mosi.

³³ Khavbo avbo, va di bikela Wulanga nya Guage ga Mosi, tshatsha ni sombo satshavbo si lumbago umo a gu esi: Sipharo, mapulango, mitalatsi, madingo ni dzitshina;

³⁴ wupfhulelo nya malowo nya dzinvuta nya guthedwe nyiwa nya gufuvile, wupfhulelo nya malowo nya wuzundzo, mwendra nya makhuvi;

³⁵ ngasa nya gidzumeledzwano ni mipingo yaye ni gikhalo nya ditshedzo.

³⁶ Meza ni sombo saye satshavbo ni sibaba nya miphaso;

³⁷ gidzigaredzo nya dzikandriya nya ndralama nya guhutwe ni dzikandriya dzatshavbo na dzi sasamedzedwe gwadi, ni sombo saye satshavbo, ni mafura nya dzikandriya.

³⁸ Giluvelo nya ndralama, mafura nya gutodze ni libani nya gunungele gwadi; mwendra wa vbamwanyatunu nya Tshatsha;

³⁹ giluvelo ni gihuto nya sugu, mipingo ni sombo saye satshavbo; ginamelo ni girandro gyaye ni madingo yaye, ni dzitshina ni mwendra nya gusege vbamwanya nya likupakupa;

⁴⁰ mwendra nya likupakupa ni madingo yaye, ni dzikhogo dzaye, ni dzingodzi ni sombo satshavbo esi si vbwetegago gu thumela wulanga nya guage, Tshatshani nya Tshangano;

⁴¹ guambala gu mburisidwego nya mithumo nya wukhozeli ya Wulangani nya Guage, nya dzingandzu nya guage, dza muphasi nya mhamba Aroni ni dzingandzu nya miphaso dza sanana saye, gasi va thuma wuphasi nya mhamba.

⁴² Sanana sa Israyeli si giride mithumo yatshavbo, khu gu landrisa sileletelo satshavbo esi Pfhumu Nungungulu a ningidego Mosi.

⁴³ Khu guralo, Mosi a di khedzisa thumo watshavbo, a wona gukhuye wu gimbide gukhedza khu edzi Pfhumu Nungungulu a mu rumidego khidzo nyamba tshiya gilo. Mosi a di va kategisa.