Ekisodha 30 - Bhibhiliya Nya Guage

Giluvelo nya phaso nya libani

¹ U na gira gambe giluvelo nya guvbisele avbo libani, u na gi gira khu sena.

² Gi na bani giri ni pimo nya kono moyo gulapha, ni kono moyo guanama, maphuvbo ya mana ma na lapha idzosaye; gukhugega gi na pima mikono mivili. Dzikeho dzaye dzi na hungana ni giluvelo dzi gira gilo gimwegyo basi.

³ U na londra vbatshani nya giluvelo khu ndralama nya guhutwe, kharato gambe ni maphuvbo yatshavbo ni dzikeho dzakone. U gira libhandri nya ndralama li dzuwuluga giluvelo gyatshavbo.

⁴ U na vega masindra mavili nya ndralama khu vbatshani nya libhandri ga maphuvbo ya mavili, ma khedzisana gasi gu bedza khumo misimbo nya mipingo nya gurwale khiyo giluvelo.

⁵ Mipingo u na yi gira khu simbo nya sena u yi londra khu ndralama.

⁶ U na vega giluvelo mbeli nya mwendra wu bhiyago Ngasa nya Gidzumeledzwano, mbeli nya gikhalo nya ditshedzo gi guromo vbatshani nya Ngasa nya Gidzumeledzwano, wulangani nyi nata mananago nago.

⁷ Khuwo wulanga wowu Aroni a na gu vbiselago avbo libani matshigu yatshavbo vbadzimindrutunu; gikhati a dongiselago dzikandriya.

⁸ A na li vbisa gambe gupfolani nya lidambo, gikhati a khondrisago dzikandriya. Khu magirelo yaya, libani li na vbiswa khu situgulwana ni situgulwana kala gupindruga mbeli gwa Pfhumu Nungungulu

⁹ Mu nga vbisini vbatshani nya giluvelo gegi limbe libani nya guhambane ni eli li vegidwego khu nayo, mwendro miphaso nya guvbiswe, mwendro miphaso nya wuguvbi; u nga vbaladzi avbo wadwa nya miphaso.

¹⁰ “Aroni a na gira milayo nya guagise dzikeho nya giluvelo, gumogo khu mwaga; khu litshigu nya mhamba nya guhandze siwono, a na todza dzikeho nya giluvelo khu novba nya girengo gi payedwago gu handza sighoho, khidzo kharati gi na agiswago khidzo giluvelo khu situgulwana ni situgulwana. Giluvelo gegi gi na bani gi agide ngudzu mahoni gwa Pfhumu Nungungulu.”

Hwengo wa nyumbani nya miphaso

¹¹ Pfhumu Nungungulu a di embela gambe Mosi, khuye:

¹² “Avbo u na sayago tengo nya sanana sa Israyeli u si lovela, muthu ni muthu a na livba ga Pfhumu Nungungulu tengo nya gudzegise womi waye, khu gikhati nya gilovela, gasi va si mani libango va wona sigaradzo vbakari nya gilovela.

¹³ Muthu ni muthu a lovedwago a na ningela tengo nya guningane gipandre nya Sekeli ya nyumbani nya miphaso, yi gu na ni magumavili dzisekeli, dzi kaswago khu vbakari u gira ningelo ga Pfhumu Nungungulu.

¹⁴ Moyo ni moyo nya ava va saywago gukhugela ga ava va tshanganisidego magumavili myaga guya mbeli va fanede gu dusa ningelo yoyu ga Pfhumu Nungungulu.

¹⁵ Oyu nya gitetema a nga engedzeli gilo, ni gisiwana gi nga vbunguli gilo avbo nya gipandre nya Sekeli, nya gulivbe tengo Pfhumu Nungungulu a mu vegedego gasi gu dzegisani khuwo womi wanu.

¹⁶ U na dzega dzitsapawu nya dzegiso dzi livbwago khu sanana sa Israyeli u dzi thumisa thumoni nya Tshatsha nya Tshangano; tshenga yeyi nya dzegiso yi na khala kha nga gidundrugiso ga sanana sa Israyeli mbeli ga Pfhumu Nungungulu, kha nga tengo nya gulivbe guvbanya gwanu.”

Ginamelo nya sugu

¹⁷ Pfhumu Nungungulu a di embela Mosi, khuye:

¹⁸ “U na gira ginamelo nya sugu gi gu na ni girandro nya sugu gasi gu hambela umo. U na gi vega vbakari ni vbakari nya gu eno giluvelo eno Tshatsha nya Tshangano, u na thela mati ginameloni.

¹⁹ Aroni gumogo ni sanana saye va na hamba umo mandza ni migondro.

²⁰ Gikhati va belago Tshatshani nya Tshangano va na hamba khu mati yaya, gasi va sifi; va na gira gambe idzosaye gikhati va hidzimelago vbagiluvelotunu gasi guya khozela ni gu gira miphaso nya guvbisedwe Pfhumu Nungungulu;

²¹ va na hamba mandza ni mawundru gasi va sifi. Wu na khala wuri nayo nya gupindruge ga Aroni ni sanana saye ga situgulwana ni situgulwana.”

Mafura nya gutodze

²² Pfhumu Nungungulu a di ganela gambe ga Mosi, khuye:

²³ “Dzega misimbo yile u yitigo gukhuwe khiyo nya gunungele gwadi ga misimbo yatshavbo: Mahwe nya mira nya gulemele livbandre mazana (500) dzisekeli; ni kinamomo nya gunungele nya mazana mavili ni livbandre magumi (250) dzisekeli, ni bandrwa nya gubhumule gwadi, nya mazana mavili ni livbandre magumi dzisekeli;

²⁴ ni kasiya nya livbandre mazana (500) dzisekeli, nya gupimwe khu sekeli ya nyumbani nya miphaso; ni pimo nya himi nya mafura nya mihandro nya miolivha.

²⁵ U na pata satshavbo u gira mafura nya gutodze sihathwa, mafura nya gubhumule gwadi kha nga idzo va ma tshanganisago khidzo vagiri nya mafura. Ma na bani mari mafura nya guage nya gutole.

²⁶ Khu mafura yaya u na todza Tshatsha nya Tshangano ni Ngasa nya Gidzumeledzwano,

²⁷ meza ni sombo saye satshavbo ni gidzigaredzo nya dzikandriya ni sombo saye satshavbo, ni giluvelo nya guvbise avbo libani,

²⁸ ni giluvelo nya miphaso nya guvbiswe ni sombo saye satshavbo, ni ginamelo ni girandro gyakone

²⁹ U na si agisa kharati, si khala sombo nya guage ngudzu; ni gevbini gi na si kuhago gi na agiswa.

³⁰ U na todza Aroni ni sanana saye, u va wumbela gasi va nyi thumela kha nga vaphasi nya mhamba.

³¹ Khavbo avbo, u na embela sanana sa Israyeli, khuwe: “Aya khayo mafura nya guage nya gutodze, ma na khala mafura yangu ga situgulwana ni situgulwana.

³² Ma nga todzwi givili nya muthu nyamba yela, gambe mu nga girini mambe mafura nya gufanane ni aya, mu pfanga misimbo ya yimweyo, kholu aya ma agisidwe; gwanu enu ma na bani mari gilo gi agisidwego.

³³ Oyu vbakari gwanu a na girago mambe nya guyedzedzele aya, mwendro gu todza khayo oyu a si dzumedziswigo khu nayo, a na fuviswa vbakari nya vathu vaye.”

Libani nya guage

³⁴ Pfhumu Nungungulu a di engedza a embela Mosi, khuye: “Vbweta misimbo nya gunungele, mitshafura, libani, ni simbe sinungedziso nya guhambanelane u pima satshavbo khu pimo moyo.

³⁵ U na si pfanga satshavbo u gira mafura nya gunungele nya gupatwe ni munyu kha nga edzi va ma pfangago khidzo vagiri nya mafura nya gunungele nya guhutwe, nya guage.

³⁶ U na si kuya u gira wuguvbi, u wu vega mbeli nya Wufakazi, Tshatshani nya Tshangano, umo nyi nata mananago nago. Mafura yaya ma na bani mari gilo gi agidego ngudzu gwago.

³⁷ Mu nga girini limbe libani nya gufanane ni eli, mu ma thumisa. U na ma wona kha nga gilo gi kategisidwego, gi kasidwego gasi guthumela basi Pfhumu Nungungulu.

³⁸ Oyu a na girago mambe nya gufanane ni aya khu gufela gufemba a pwa gunungela gwaye, a na fuviswa vbakari nya vathu vaye.”