Ekisodha 26 - Bhibhiliya Nya Guage

Makhuvi nya Tshatsha

¹ “U na emisa Tshatsha nya guage, khu likhumi malawu nya gulugwe khu wuluva nya wumburi ni mwendra nya livala la damboni, nya guthedwe nyiwa nya guhambanelane, nya guvbyuge, nya giwunguwungu. U ma mburisela khu gu lugela sifananiso nya dzikerubhimi.”

² Lidawu ni lidawu, gu vbwetega pimo nya gulaphe gwaye, magumavili na livbandre na miraru mikono; ni mikono mina guanama, malawu yatshavbo ma dingana khu mipimo yoyo.

³ Livbandre malawu ma na yingwa ma khala limwedo, mambe livbandre malawu ma na yingwa nayo ma khala limwedo.

⁴ Khu dzitshokhani nya lidawu nya guhegule u na hunga dzingodzi nya gupendrwe khu livala la damboni; u na gira idzosaye u hunga dzingodzi wubambe nya limbe lidawu nya wuvili.

⁵ U na vbora livbandre magumi dzingodzi gasi gu hungelela ndzari nya guhegule, ni dzimbe livbandre magumi dzingodzi gasi gu hungelela eyi nya wuvili, dzingodzi gu vbwetega dzi khedzisana.

⁶ U na gira gambe livbandre magumi sikhweletedzo nya ndralama, u tshanganisa malawu yatshavbo khu sikhweletedzo sesi gasi Tshatsha nya guage wu manega wuri moyo basi.

⁷ U na gira malawu nya mawoya nya dziphongo, gasi gu pfhulela khayo wulanga nya guage. U na gira likhumi na limwedo malawu.

⁸ Lidawu ni lidawu li na bani na liri ni magumararu mikono gulapha ni mikono mina guanama; malawu yaya nya likhumi na limwedo ma na ningana idzosaye.

⁹ U na tshanganisa livbandre malawu phuvbo mwedo, u wuya u tshanganisa aya mambe nya livbandre na limwedo ma na tshalago khu yimbe phuvbo. Eli nya livbandre na limwedo li na khala na li fumbidwe vbamwanyatunu nya Tshatsha.

¹⁰ Dzibambe nya lidawu la mahegiso nya yale nya livbandre, u na vegedzela livbandre magumi dzingodzi; kharato gambe ga dzimbe nya lidawu la mahegiso nya yale nya livbandre na limwedo, u na vegedzela livbandre magumi dzingodzi.

¹¹ U na gira livbandre magumi sikhweletedzo nya sugu, u si hungelela khu dzingodzi, u tshanganisa kharati Tshatsha, gasi wu khala moyo basi.

¹² Malawu ma na tshalago, gipandre gi na tshalago nya lidawu nya Tshatsha gi na tshiga gipatwatunu gya hwane nya Wulanga nya Guage.

¹³ Kono wu na vbindrago, phuvbo ga eno ni phuvbo ga eyi nya gulaphe nya Wulanga nya Guage wu na tshiga mudzibambe gakone gasi gu wu fenengedza.

¹⁴ Tshatsha u na wu pfhulela khu malowo nya nvuta nya gupendrwe khu nyiwa nya gufuvile, khu vbatshani u handzega malowo nya gumburisedwe.

Mapulango nya Wulanga nya guage

¹⁵ U na gira gambe dzitabwa nya simbo nya sena u dzi emisa gasi gu bhiya khidzo Wulanga nya Guage.

¹⁶ Tabwa ni tabwa yi na bani yiri ni mipimo yeyi: Likhumi mikono gulapha; ni kono moyo ni gipandre guanama.

¹⁷ Tabwa ni tabwa yi na bani yiri ni sitshanganiso sivili gasi gu yingana ni yikwawe. U na gira idzosaye dzitabwa dzatshavbo nya Wulanga nya Guage.

¹⁸ Khavbo avbo, u na gira magumavili dzitabwa nya Wulanga nya Guage, u dzi emisa dzi khedzisa Negebhi, phuvbo ga Marandzi.

¹⁹ U na gira magumana siseketelo nya parata; siseketelo sivili vbavbatshi nya tabwa ni tabwa gasi gu kwatamisa khiso umo nya sitshanganiso nya sivili.

²⁰ Ga gipandre nya wuvili khu phuvbo ga Wuronga nya Wulanga nya Guage, u na gira magumavili dzitabwa,

²¹ ni magumana siseketelo nya parata; sivili khu tabwa ni tabwa.

²² Khu phuvbo ga Muhwadambo nya Wulangaa nya Guage, u na gira livbandre na mweyo dzitabwa.

²³ U na gira dzitabwa dzimbili mudzikhonani dza magumbini nya Wulanga nya Guage.

²⁴ Dzi na tshanganiswa vbavbatshi ni vbatshani khu lisindra la limwegyo. Gu na girwa idzosaye ga dzitabwa dza dzimbili dzi vegidwego dzikhonani dza dzimbili.

²⁵ Khu guralo, gu na bani guri livbandre na dzitharu dzitabwa ni siseketelo saye nya parata si ninganago tengo nya likhumi na livbandre na gimwegyo, sivili sivili khu vbavbatshi nya tabwa ni tabwa.

²⁶ U na gira mitalatsi khu simbo nya sena, livbandre yi na hunga dzitabwa nya Wulanga nya guage,

²⁷ yimbe livbandre mitalatsi ga dzitabwa dza phuvbo nya wuvili ni yimbe livbandre ga dzitabwa dza magumbini nya Wulanga nya guage, khu phuvbo ga Muhwadambo.

²⁸ Talatsi wa vbakari ni vbakari wu na hunga dzitabwa dzatshavbo gukhugela mahegiso kala mahegiso.

²⁹ U na londra dzitabwa khu ndralama, u na gira masindra khu ndralama u na bedzago khumo mitalatsi, u yi londra niyo khu ndralama.

³⁰ “U na vbaha kharati Wulanga nya guage gukhwatshi khu giwonelo nyi gu nonedzidego mugigomoni.”

Mwendra nya makhuvi

³¹ “Khu gulandrela, u na gira mwendra nya livala nya nga la damboni, nya giwunguwungu, nya guvbyuge, ni linyu nya wuzundzo nya gulugwe khu wumeseri, yi vegedzedwa sifananiso nya dzikerubhimi.”

³² U na wu vbayega khu sikhweletedzo nya ndralama vbatshani nya madingo mana nya misimbo nya sena nya gulondrwe khu ndralama, ma tshomegidwego avba nya dzitshina nya parata.

³³ U na vbayega mwendra nya makhuvi khu vbavbatshi nya sikhweletedzo, wulangani wowu wu bhiyidwego khu mwendra nya makhuvi, khavbo u na vegago Ngasa nya Gidzumeledzwano. Mwendra nya makhuvi wu na hambanisa Wulanga nya Guage ni Wulanga nya Guage Ngudzu.

³⁴ U na vega gikhalo nya ditshedzo vbatshani nya Ngasa nya Gidzumeledzwano makhuvini nya Wulangani nya Guage ngudzu.

³⁵ Meza u na yi vega vbavbandze nya mwendra nya makhuvi, u vega gidzigaredzo nya dzikandriya mbeli nya meza khu phuvbo ga Marandzi nya Wulanga nya Guage, gasi meza yi na khala khu phuvbo ga Wuronga.

³⁶ Vbamwanyatunu nya Wulanga nya Guage u na vega mwendra nya makhuvi nya livala nga la damboni ni giwunguwungu, wu lugidwego gwadi wu mburisedwa khu wumeseri.

³⁷ “Gasi gu handzega avbo mwendra wowu, u na vega livbandre madingo nya simbo nya sena, nya gulondrwe khu ndralama; sikhweletedzo sakone gu vbwetega nya ndralama, u na pfhula livbandre dzitshina nya sugu.”