Ekisodha 25 - Bhibhiliya Nya Guage

IV. MILAYO NYA WUPHASI NYA MHAMBA Nyumba nya guage ni miningelo

¹ Pfhumu Nungungulu a di ganela ga Mosi, khuye:

² “Embela sanana sa Israyeli si gira mihengo si nyi resela. U na hakha tshenga yangu ga muthu ni muthu a dusago na salalegide monyoni gwaye.”

³ Mu na hakhani gwawe miningelo yeyi: Ndralama, parata, sugu,

⁴ myendra nya livala nya nga la damboni, nya giwunguwungu, ni gufuvila, nya seda ni mawoya nya phongo,

⁵ ni malowo nya dzinvuta ma thedwego nyiwa nya gufuvile; malowo nya guvbevbuge ni mapulango nya simbo nya sena,

⁶ ni mafura nya dzikandriya, ni simbo nya gunungedzise mafura nya gutole ni libani nya guvbiswe,

⁷ siwindri nya onikisi ni simbe siwindri nya wuzundzo si na namegedzwago avbo nya efodhe ni gikhweso gya vbakhanatunu nya vaphasi nya mhamba.

⁸ Mu na nyi vbahela nyumba nya miphaso nyifela gu khala khumo vbakari gwawe;

⁹ Mu na girani wulanga nya guage ni sombo saye satshavbo gukhedza khu giwonelo nyi na mi nonedzago.

Ngasa nya Gidzumeledzwano

¹⁰ Mu na girani ngasa nya gidzumeledzwano khu mapulango nya sena nya gulaphe tanga nya mikono mivili ni gipandre, ni kono moyo ni gipandre guanama, ni kono moyo ni gipandre gukhugega.

¹¹ U na yi londra khu ndralama nya lisima khu ndrani ni vbavbandze, u gira kwenga nya ndralama wu yi dzuwuluga maphuvbo yatshavbo.

¹² U na pfhula masindra mana nya ndralama u ma vega dzikhonani dza dzina nya ngasa nya gidzumeledzwano; mavili khu phuvbo mwedo ni mambe mavili khu yimbe phuvbo.

¹³ U na vatisa dzindronga nya simbo nya sena u dzi londra khu ndralama;

¹⁴ U na bedza dzindronga umo nya masindra ma guromo dzibambe nya ngasa, gasi gu yi pinga khidzo.

¹⁵ Dzindronga gu vbwetega gikhati gyatshavbo dzi khala na dzi tshomegedwe masindrani. Gima dzi nga duswi gambe.

¹⁶ Ndrani nya ngasa u na vega Wufakazi nya gidzumeledzwano, nyi na gu ningago.

Gikhalo nya ditshedzo

¹⁷ U na gira gambe gikhalo nya ditshedzo a gu gifenengedzo nya ngasa khu ndralama nya lisima, giri ni mikono mivili ni gipandre gulapha ni kono moyo ni gipandre guanama.

¹⁸ Khavbo avbo, u na gira dzikerubhimi dzimbili khu ndralama nya gupfhudwe nyamba yingwa, dzi wonega mahegiso nya gikhalo nya ditshedzo khu maphuvbo ya mavili.

¹⁹ Kerubhimi mweyo khu mahegiso ga eno, yimbe kerubhimi khu mahegiso ga eyi, dzi patwa gumogo ni gikhalo nya ditshedzo dzi khala dzi khedzisana; mu na dzi gira mahegiso ga maphuvbo yaye ya mavili.

²⁰ Dzikerubhimi dzi na thawuludza dzimbapi dzawe vbatshani, dzi fenengedza gikhalo nya ditshedzo. Dzi na khedzisana, dzikhovbe dzawe dzi na nogela gikhalotunu nya ditshedzo.

²¹ U na handzega gikhalo nya ditshedzo vbatshani nya ngasa, ndrani nya ngasa u vega Wufakazi nyi na gu ningago.

²² Nyi na ta dzi wonegisa gwago khu vbagikhalotunu nya ditshedzo, vbakari nya dzikerubhimi dzi guromo Vbatshani nya ngasa nya gidzumeledzwano, khuwo wulanga wowo nyi na ta gu tivisago khavbo milayo yangu yatshavbo ga sanana sa Israyeli.

Meza nya sibaba nya gukategiswe

²³ Khu gulandrela u na gira meza khu mapulango nya simbo nya sena. Gulapha nya iyo u na pima mikono mivili, guanama kono moyo, gukhugega kono moyo ni gipandre

²⁴ U na yi londra khu ndralama nya guhutwe u yi girela gambe kwenga khu ndralama wu dzuwuluga meza yatshavbo.

²⁵ U na yi tiyisa khu lipulango nya tanga nya gyandza gugula li dzuwuluga meza yatshavbo, u gira gambe libhandri nya ndralama u li fumbela khilo.

²⁶ U na yi girela niyo masindra mana nya ndralama, u ma khokhotela mudzikhonani dza dzina nya meza, umo nya mawundru yaye ya mana.

²⁷ Masindra yaya gu vbwetega ma khokhotedwa vbafuvbi ni lipulango li dzuwulugago meza, umo nya mawundru yaye ya mana.

²⁸ U na gira mipingwi khu simbo nya sena u yi londra khu ndralama gasi gu rwala khiyo meza.

²⁹ U na gira dzimbiya, mikanvu ni mikho ni sikombe nya guthele khiso mawadwa vbagiluvelotunu. Sombo sesi satshavbo u na si gira khu ndralama nya guhutwe.

³⁰ Vbatshani nya meza yeyi u na vega sibaba nya miningelo nya miphaso, si khala avbo gikhati gyatshavbo si wonega mahoni gwangu.

Gidzigaredzo nya dzikandriya

³¹ U na gira gambe gidzigaredzo nya dzikandriya khu ndralama nya guhutwe. Gidzigaredzo gyogyo gi na girwa khu ndralama nya gupfhudwe gi bethwa gumogo ni litshina ni matamo yakone si khala gilo gimwegyo basi nyamba yingwa; sifugwana nya guthele mafura ni sihakhedzelo sakone, si na mburisedwa khu mahagane ni senge, si bethwa gumogo ni gidzigaredzo.

³² Khu dzibambe gu na duga livbandre na limwedo matamo; mararu khu phuvbo mwedo, ni mambe mararu khu yimbe phuvbo.

³³ Litamo ni litamo nya aya nya livbandre na limwedo ma dugago khu vbagidzigaredzotunu li na bani liri ni sifugwana siraru nya gufanane ni senge nya alimondi, gifugwana ni gifugwana gi na mburisedwa khu mahagane ni senge sakone.

³⁴ Aholu vbatshinatunu nya gidzigaredzo nya dzikandriya gu na bani guri ni sifugwana sina nya gufanane ni senge nya alimondi na si mburisedwe khu wenge nya mahagane yakone.

³⁵ Gifugwana gimwegyo vbatshani ya mavili nya guphele ma dugago khu tshinani, gifugwana gimwegyo gambe vbatshani nya matamo ya mavili ma handzamedzago, ni gifugwana gimwegyo gambe vbatshani nya matamo nya guhegise, u gira kharato ni matamo yatshavbo nya livbandre na limwedo ma dugago khu tshinani nya gidzigaredzo nya dzikandriya.

³⁶ Sifugwana ni matamo si na bethwa si gira gilo gimwegyo basi ni gidzigaredzo nya dzikandriya, nya gupfhudwe khu ndralama nya guhutwe.

³⁷ U na gi girela gambe livbandre na dzimbili dzikandriya dzi na tshomegwago vbatshani nya gidzigaredzo, dzi wenengedza mbeli gwaye.

³⁸ Sitshimo sakone ni simbiyana nya guthegele umo nguma si na girwa khu ndralama nya guhutwe.

³⁹ U na gira gidzigaredzo nya dzikandriya ni sombo saye satshavbo khu gipimo nya talenta nya ndralama yi hutidwego.

⁴⁰ Thela kota khu gu gi gira kha nga giwonelo u nga nonedzwago mugigomoni momu.