Ekisodha 20 - Bhibhiliya Nya Guage

Milayo nya likhumi

¹ Khavbo avbo, Nungungulu a di ganela magana yaya yatshavbo, khuye:

² “Eni kheni Pfhumu Nungungulu wago, nyi gu dusidego khu tigoni ga Egipito, nyumbani nya wugumbi.”

³ U nga manegi nuri ni vambe vanungungulu mbeli gwangu.

⁴ U nga tshuki u dzi girela githombe nya guvatwe, mwendro gifananiso nya esi si guromo vbatshani, ndzadzini, mwendro nya esi si guromo vbavbatshi, mafuni, mwendro nya esi si guromo guetani nya mati, vbavbatshi nya mafu.

⁵ Khu na nga khidzima mbeli nya silo soso, gambe gima khu na nga si khozela, kholu eni kheni Pfhumu Nungungulu wago, nyi Nungungulu nya wufu, nyi ngu tsayisa sanana khu kotani nya gighoho gya vavelegi vawe kala gitugulwana nya wuraru negi nya wu na ga vale va nyi vengago.

⁶ Aholu, nyi ngu girela wuhindzi, kala gitugulwana nya likhumi mazana (1.000) ga vale va nyi golago, va wuya va vegisa milayo yangu.

⁷ U nga hagani khu lina la Pfhumu Nungungulu wago, kholu Pfhumu Nungungulu kha na nga diga gu tsayisa oyu a haganago khu lina Laye umo nyamba vbwetega.

⁸ Alakanya litshigu nya Sabhadho, u li agisa.

⁹ U na thuma livbandre na limwedo matshigu u gira mithumo yago yatshavbo.

¹⁰ Aholu litshigu nya livbandre na mavili, Sabhadho ya Pfhumu Nungungulu wago; u nga thumi gilo khu litshigu lolo uwe mwendro gyanana gyago nya gikhwathana, mwendro githumi gyago nya mwama mwendro nya nyamayi, ambari gifuyo gyago, mwendro muluveli a khalago ndrangani gwago.

¹¹ Kholu, khu livbandre na limwedo matshigu, Pfhumu Nungungulu giride ndzadzi ni mafu, linene ni satshavbo si guromo umo, a gu hefemula khu litshigu nya livbandre na mavili. Khu kotani nya kharato, Pfhumu Nungungulu kategiside litshigu nya Sabhadho a li agisa.

¹² Rungudza babe ni mayi wago, gasi ma engedzedwa matshigu yago nya guvbanye tigoni u na ningwago khu Pfhumu Nungungulu wago.

¹³ U nga songi.

¹⁴ U nga bhayi.

¹⁵ U ngabi.

¹⁶ U nga singedzi malipha muthu kwanu.

¹⁷ U nga dogoreli nyumba ya muthu kwanu. U nga dogoreli mwangadzi wa muthu kwanu; mwendro githumi gyaye nya mwama mwendro nya nyamayi, ambari mombe yaye, mwendro buru yaye, mwendro gimbe gilo gi mu lumbago, u nga gi dogoreli.

Mosi, mutshanganisi wa vathu ni Nungungulu

¹⁸ Va na Israyeli vatshavbo va dipwa gupandra nya mabara, ni gudzuma nya pundru, va wona gulasa ni gu tuviga nya wutshi. Avbo vathu va nga wonago esi, va di ndrendremela ngudzu va emela hwindzo.

¹⁹ Vathu va di embela Mosi, khavo: “Ganela uwe ga ethu, ethu hi na yingisa; aholu a nga ganeli Nungungulu ga ethu, kholu hi ngafa.”

²⁰ Mosi a di embela vathu, khuye: “Mu nga thavi. Kholu Nungungulu a dita, gasi guta mi linga, khu gu fela gukhuye githawo gyaye gi manega na gi romo mbeli gwanu, gasi mu si ghohini.”

²¹ Vathu va di ema hwindzo, aholu Mosi a di hidzimela vbafuvbi ni lipfhi nya gusivbale, avbo a nga bani ari avbo Nungungulu.

Milayo mayelano khu siluvelo

²² Khu guralo, Pfhumu Nungungulu a di embela Mosi, khuye: “U na ganela kharati ga sanana sa Israyeli, khuwe: Enu mu si wone khu maho yanu gukhenu Eni nyi ganede nanu na nyiri khu ndzadzini.

²³ Khu guralo, mu nga girini vanungungulu nya parata mwendro nya ndralama, mu va vega vbafuvbi gwangu. Mu nga girini isoso.

²⁴ U na nyi girela giluvelo khu mafu, u ningelago avbo miphaso yago nya guvbiswe, ni eyi nya gubonge, ni dzimhamba dzago nya dzinvuta ni dzimombe. Ni wevbini wulanga nyi wu hathidego gasi gu alakanya avbo Lina langu, nyi nata gwago nyi ta gu kategisa.

²⁵ Wa gu nyi girela giluvelo khu siwindri, u nga vbahi khu siwindri si vatidwego, kholu wa gu khusedza mbato yago vbagiwindritunu u na gi nyenyezisa.

²⁶ U nga liti vbagiluvelotunu gwangu khu sigandro, kholu gu nga wonega avbo wumbwiri wago.