Ekisodha 17 - Bhibhiliya Nya Guage

Mati nya giwindri gya Refidhimi

¹ Khu hwane, tshangano watshavbo nya sanana sa na Israyeli wu di khuga khu giwulani gya Sine va gimbila khu mipfhuka va nga bani va pimedwe, kha nga idzo Pfhumu Nungungulu a nga rumago khidzo. Va di ya zumba Refidhimi; aholu gu diri mwalo vbale mati nya gusele vathu.

² Vathu va di wugela Mosi, khavo: “Hi ninge mati hi sele.” Mosi a di va hakha, khuye: “Khu ginani mu wugelago eni? Khu ginani mu lingago Pfhumu Nungungulu?”

³ Avbovbo, vathu va dipwa lidora nya mati, va bhongela Mosi, khavo: “Khu ginani u hi dusidego khu tigoni Egipito, u di fela gu ta hi songa khu lidora, ethu gumogo ni sanana sathu ni sifuyo sathu, gani?”

⁴ Mosi a di rana Pfhumu Nungungulu a mu embela, khuye: “Nyi na gira ginani eni ga vathu vava? Gu tshala vbadugwana basi, va na nyi pfara khu siwindri.”

⁵ Pfhumu Nungungulu a di embela Mosi, khuye: “Vbindra u thanga mbeli nya vathu, dzega madhota nya gukari ya na Israyeli, phara ndronga yago, yile u nga veta khiyo tsongo, u hongola.

⁶ Eni nyi na gu thangela, nyi ya gu emela vbatshani nya giwindri gya Horebhi. Uwe u na veta giwindri, gu na duga mati va sela vathu.” Mosi a di gira kharato mbeli ga madhota ya na Israyeli.

⁷ Mosi a di rana wulanga wule khuye Masaha ni Meribha, khu kotani nya gu ganedze ga sanana sa Israyeli, ni olu va nga lingago Pfhumu Nungungulu, khavo: “Ina Pfhumu Nungungulu womo mwendro mwalo vbakari gwathu?”

Nyimbi ya va na Israyeli ni Vaamaleki

⁸ Khavbo avbo, Vaamaleki va dita Refidhimi va ta khutha va na Israyeli, va gu va dwanisa.

⁹ Mosi a di embela Josuwa, khuye: “Hi hathele vama nya gukari, u duga u ya dwana ni Amaleki. Eni mindru nyi na ya ema vbatshani nya gigomo na nyi pharide ndronga ya Nungungulu.”

¹⁰ Josuwa a di gira esi a nga rumwago khu Mosi, a di duga aya dwana ni Amaleki. Aholu Mosi, Aroni ni Huri va di lita tshokatunu nya gigomo.

¹¹ Gikhati Mosi a nga bani a gu khusedza mawogo, Israyeli a di pala. Aholu gikhati a nga bani a gu reledza mawogo, Amaleki a di pala.

¹² Khu guralo, gu di vboha avbo mawogo ya Mosi ma nga garalago, ma gu lemela. Va di resa giwindri va ta gi vega vbavbatshi gwaye. Mosi a di khala vbagiwindritunu, Aroni ni Huri va di pharedzela mawogo yaye, mumbe khu nyambade, mumbe khu nyamudye gwaye. Khu magirelo yaya, mawogo ya Mosi ma di simama gu tiya kala li gu pfola lidambo.

¹³ Josuwa a di pala kharati Amaleki ni vathu vaye khu matshari.

¹⁴ Khavbo avbo, Pfhumu Nungungulu a di embela Mosi, khuye: “Lova silo sesi libhukuni, gu khala gialakanyiso gi sayiswago, u embela gambe Josuwa, khuwe: Eni nyi na gira gu Amaleki a fuva a si alakanwi gambe vbavbatshi nya lidambo.”

¹⁵ Mosi a di gira giluvelo a gi rana khu lina nya gupwani: “Pfhumu Nungungulu khuye Ngavbya yangu.”

¹⁶ Uye a di khuye: “Kholu Amaleki a wugedego giluvelo gya Pfhumu Nungungulu, nyimbi ya Pfhumu Nungungulu ni Amaleki yi na thapela mimela ni mimelana.”