Ekisodha 13 - Bhibhiliya Nya Guage

Nayo nya sanana nya matiwula

¹ Pfhumu Nungungulu a di ganela a embela Mosi, khuye:

² “U na phasela Eni gyanana gyatshavbo nya matiwula, gyanana gyatshavbo nya guphele ndrani ga mayi waye, vbakari nya vathu va na Israyeli ni nya sirengo, gya gu lumba Eni.”

³ Mosi a di embela vathu, khuye: “Dundrugani litshigu leli mu dugidego khilo khu Egipito, ndrangani nya wugumbi, kholu Pfhumu Nungungulu a mi duside khu gyandza nya tshivba; khu guralo, mu nga tshuki mu hodza gibaba nya guthedwe mela.

⁴ Mu ngu dugani muhuno khu ngima nya Abhibhi.

⁵ Avbo Pfhumu Nungungulu a na gu mi bedzago tigoni ga Vakhanani, ga Vahiti, ga Vaamori, ga Vahevhi ni ga Vajebhusi, litigo lile a sambanyidego ga vababe vago gukhuye a na gu ninga, litigo li gogago mahwe ni wulombe, u na ya gira phaselo yoyu khu ngima yoyu.

⁶ U na vbedza livbandre na mavili matshigu u na gu hodza sibaba nyambana mela; khu litshigu nya livbandre na mavili u na gira tshangano nya gurungudze Pfhumu Nungungulu.

⁷ Mu na hodza sibaba nyambana mela livbandre na mavili matshigu, ndrani nya matshigu yoyo gu nga wonegi sibaba nya guthedwe mela ndrangani gwago ni mela wu nga manegi tigoni gwago gwatshavbo.

⁸ Litshigu lolo kamwe, u na tshamusela gyanana gyago, khuwe: “Buzo wowu, wa gualakanya esi Pfhumu Nungungulu a nyi giredego litshigu nyi dugidego khu Egipito.”

⁹ Gi na khala kha nga giwoniso mandzani gwago, kha nga gialakanyiso mahoni gwago, gasi nayo wa Pfhumu Nungungulu wu manege wuri kanani gwago, kholu Pfhumu Nungungulu a gu duside khu tigoni ga Egipito khu gyandza nya tshivba.

¹⁰ Khu guralo, u na vegedza gialakanyiso khu mwaga ni mwaga khu gikhati gyakone.

Matiwula

¹¹ Gikhati Pfhumu Nungungulu a na gu bedzago tigoni ga Vakhanani, kha nga a sambanyidego gwago ni ga vababe vago, gu gu ninga li khala lago,

¹² u na phasela Pfhumu Nungungulu gyanana gyatshavbo nya matiwula, ni matiwula yatshavbo nya sifuyo sago; matiwula yatshavbo nya matune ma na lumba Pfhumu Nungungulu.

¹³ Aholu matiwula yatshavbo nya buru, u na ma dzegisa khu ginvutana, wa gumba gi dzegisa, u na gi fanya thamo. U na dzegisa gambe gyanana gyatshavbo nya matiwula nya muthu ni muthu.

¹⁴ Gyanana gyago, ga matshigu matago, gya gu gu wudzisa khigyo: Esi sa gu tshamusela ginani?” U na gi hakha, khuwe: Pfhumu Nungungulu a hi duside khu tshivba yaye nya yikhongolo ngudzu khu tigoni ga Egipito, tigoni hi nga bani hiri dzikhumbi.

¹⁵ Kholu gikhati Faro a nga bangisa monyo waye a bomba gu hi tshula hi duga, Pfhumu Nungungulu a di songa sanana satshavbo nya matiwula sa tigoni ga Egipito. Gukhugela matiwula nya vathu kala matiwula nya sirengo. Khigyo givangelo gi nyi girago nyi paya sifuyo satshavbo nya vamatune si phelago khiso gu duga ndrani ga vamayi vawe nyi phasela Pfhumu Nungungulu, nyi dzegisa matiwula yatshavbo nya sanana sangu.

¹⁶ “Gi na khala kha nga giwoniso mandzani gwago ni vbagiwombotunu gwago, kholu Pfhumu Nungungulu a gu duside khu Egipito khu gyandza nya tshivba.”

Guduga ga va na Israyeli khu Egipito

¹⁷ Gikhati Faro a tshudego vathu va duga, Nungungulu kha va diga va bela khu ndzila nya guvbindre khu tigoni ga Vafilisitiya, ambari ulo yi nga bani yiri iyo nya vbafuvbi ngudzu, kholu Nungungulu a di khuye: “Vathu va gu mana dzinyimbi, va na vbela tshivba va dzi laya, va bwelela tigoni ga Egipito.”

¹⁸ Aholu Nungungulu a di va ndreyisa khu ndzila nya gubele khu giwulani va thonona Yiphwa nya Gufuvile. Va na Israyeli va dugide khu Egipito na va dongide matshari.

¹⁹ Mosi a di dzega marambo ya Josefa, kholu Josefa a di sambanyiside sanana sa Israyeli, khuye: “Khu lisine Nungungulu a na mi endrela, la gu vboha litshigu lolo, mu fanede gu dzega marambo yangu tigoni momu mu hongole nawo.”

²⁰ Avo va khugide khu Sukoti va vboha Etani va ya gira lizumbo vbinganoni nya giwula.

²¹ Pfhumu Nungungulu a di va thangela a gimbila mbeli gwawe; mihaniyile a di khusa lipfhi gasi gu va nonedza ndzila, vbawutshigutunu a di khondrisa nilo gasi gu va wenengedza ndzila, va kodza gu gimbila wutshigu ni mihani.

²² Lipfhi li nga bani li va thangela mihaniyile, ni nilo wu nga bani wu va wenengedza wutshigu si di si khugi mbeli nya vathu.