Dzindzimo 99 - Bhibhiliya Nya Guage

Pfhumu Nungungulu wathu, Nungungulu a agidego

¹ Pfhumu Nungungulu a ngu fuma! Ma na ndrendremele mayigo. Khade vbatshani nya dzikerubhimi li ngu khuyuga litigo.

² Pfhumu Nungungulu khongolo Siyoni, khusegide vbatshani nya mayigo yatshavbo.

³ Va na dhumise lina lago nya likhongolo nya guthavisege! Kholu li agide.

⁴ Uwe u Pfhumu nya tshivba u golago gululama, U tiyiside esi si lulamidego, u ngu lamula sanana sa Jakobe khu nayo ni lisine.

⁵ Rungudzani Pfhumu Nungungulu wathu , khidzimani migondroni gwaye, kholu Uye agide.

⁶ Mosi ni Aroni va diri vbakari nya vaphasi vawe nya mhamba, Samuweli moyo nya avo va nga rungudza lina laye, avo va di gu rana Pfhumu Nungungulu, uye a va hakha.

⁷ Uye a di ganela nari vbakari nya mapfhi avo va di landrisa milayo ni sileletelo a nga va ningago.

⁸ Pfhumu Nungungulu wathu, uwe u di va hakha! U va yeyedzide gukhuwe u Nungungulu nya gutsetselele, ambari khu kharato, u di tsayisa mithumo yawe.

⁹ Rungudzani Pfhumu Nungungulu wathu, mu khozeleni gigomoni gwaye nya gukatege! Kholu, Pfhumu Nungungulu wathu agide!