Dzindzimo 96 - Bhibhiliya Nya Guage

Nungungulu mufumeli nya litigo latshavbo

¹ Embani ga Pfhumu Nungungulu ndzimo nya yiphya; embani ga Pfhumu Nungungulu, enu vathu vatshavbo va tigoni;

² embani ga Pfhumu Nungungulu, mu dhumisa lina laye; tivisani guvbanyisa gwaye matshigu yatshavbo.

³ Pwadzani wuzundzo waye vbakari nya mayigo, ni mithumo yaye nya guliwugise ga vathu vatshavbo.

⁴ Kholu Pfhumu Nungungulu khongolo fanede gu dhumiswa, fanede gu ningwa githawo guvbindra vanungungulu vatshavbo.

⁵ Kholu vanungungulu vatshavbo va nya mayigo, khandri vanungungulu sifananiso basi, aholu, Pfhumu Nungungulu, giride ndzadzini.

⁶ Wudhumo ni wugulu somo mbeli gwawe, tshivba ni wumburi, somo nyumbani nya guage.

⁷ Dhumisani Pfhumu Nungungulu enu mafumbu nya vathu, dhumisani Pfhumu Nungungulu khu tshivba ni wuzundzo waye.

⁸ Khusedzani Pfhumu Nungungulu khu wuzundzo nya lina laye, resani miphaso mu bela siluveloni gwaye.

⁹ Khozelani Pfhumu Nungungulu na mu ambade guaga, ndrendremelani mbeli gwaye enu vathu va tigoni.

¹⁰ Ganelani vbakari nya mayigo, khenu: “Pfhumu Nungungulu a ngu fuma.” A ngu tiyisa litigo, ilo kha li khuyugi, a ngu lamula mayigo khu gululama.

¹¹ Gu na tsake ndzadzini, mafuni gu nengela, Gu na dzume linene ni satshavbo si guromo ga ilo.

¹² Mikova yi na nengele ni satshavbo si guromo umo, yi na kulungele misimbo yatshavbo ya khabini,

¹³ mbeli ga Pfhumu Nungungulu atago, kholu a nguta, ata lamula litigo; a na lamula litigo ni vathu khu gululama, gukhedza khu gutumbega gwaye.