Dzindzimo 92 - Bhibhiliya Nya Guage

Ndzimo nya gudhumise Nungungulu

Ndzimo nya litshigu nya Sabhadho

¹ Gwadi gu gu bongwa Pfhumu Nungungulu ni gu rungudza lina lago khu dzindzimo, uwe u Khusegidego ngudzu,

² gu ngu tsakisa gu huwelela lihaladzo lago na gu ngari dzimindru, ni gutumbega gwago vbasilambotunu,

³ na gu wombwa mihwambi ni mitandrandra, na gu embeledwa khu sitendre.

⁴ Kholu, sigiro sago Pfhumu Nungungulu si ngu tsakisa; Nyi na womba kulungwane nyi tsakela thumo nya mandza yago.

⁵ Pfhumu Nungungulu mithumo yago yikhongolo ngudzu! Mipimiso yago mi etide ngudzu!

⁶ Sipumbu kha si mati mahungu yaya, ambari va nya guhandruga kha va si pimi esi.

⁷ Vathu nya guvivbe ambari va dandra kha nga mwasi, vatshavbo va thumago guvivba va andra, mahegiso yawe va na mbembiswa kala gupindruga,

⁸ aholu uwe Pfhumu Nungungulu, u Khusegide kala gupindruga.

⁹ Hi ngu dziti gukhethu valala vago Pfhumu Nungungulu va na mbembiswa, vatshavbo va girago guvivba va na phalalegiswa.

¹⁰ Aholu eni u nyi ningide tshivba gukhwatshi kheyi nya nyari, u nyi todzide hungoni khu mafura yago nya gunungele.

¹¹ Nyi na wona khu maho yangu gu thega ga valala vangu, ni dzindzeve dzangu dzi napwa va nya guvivba, vale va nyi wugelago.

¹² Va nya gululama va na buga kha nga ngindru, va dandra nga misimbo nya sedhari ya Libhanoni.

¹³ Avo va yadwego Nyumbani ga Pfhumu Nungungulu, va na thela matamo dzindzarini nya Nyumba ya Nungungulu wathu.

¹⁴ Ambari na va gumbide, va na ninga mihandro, gikhati gyatshavbo va na mana tshivba, va tala khu womi,

¹⁵ gasi va tivisa khavo Pfhumu Nungungulu lulamide. Uye khuye muvhikeli wangu, avbo gwaye gi mwalo nya guvivbe.