Dzindzimo 90 - Bhibhiliya Nya Guage

LIBHUKU NYA WUNA Matshigu nya muthu ma rode ngudzu

Nombelo wa Mosi muthu wa Nungungulu

¹ Pfhumu Nungungulu u khade wuthavelo wathu, gukhugela mimela ni mimelana.

² Khu gale, sigomo na si ngari mwalo, na wu si gu vangi litigo ni mafu, uwe u Nungungulu kala gupindruga!

³ Uwe u ngu bweledza muthu a khala nguma, u mu embela, khuwe: “Bwelelani mafuni enu sanana nya vathu.”

⁴ Kholu mahoni gwago likhumi nya mazana myaga, gukhwatshi khu litshigu la vbanova li vbindridego, yi wonega kha nga gikhati nya gupile wutshigu.

⁵ U ngu vbiyela vathu va vbindra mafuni kha nga ndroro, va fanana ni mwasi wu nyugago dzimindrudzile;

⁶ vbadzimindrutunu wu nyuga wu rumbuga, vbasilambotunu wu wu na wu banga.

⁷ Kholu khu lisine hi ngu vbiyedwa khu likhulo lago, guvbenya gwago gu ngu hi vbedza tshivba.

⁸ U vegide sighoho sathu mbeli gwago, u ngu vega guwonegelani sighoho hi giridego gusihalani.

⁹ Matshigu yatshavbo nya guvbanye gwathu, ma ngu pidwa khu kotani nya likhulo lago; myaga yathu ya gu vbindra kha nga gu dagata nya hefemulo.

¹⁰ Matshigu nya guvbanye gwathu ma gu dingana livbandre na mavili magumi (70), avo va gu ni tshivba va gu vbohisa livbandre na mararu magumi (80), aholu myaga yoyo yi tade khu sigaradzo ni gu tshaniseka, ya gu vbindra khu guvbiredza, ethu hi mwalalega.

¹¹ Khu mani a yitigo tshivba nya likhulo lago? Khu mani a si thedwigo hwanga khu guvbenya gwago?

¹² Hi hevbudze gusaya matshigu nya guvbanye gwathu, gasi myonyo yathu yi mana guti.

¹³ Pfhumu Nungungulu, wuya eno gwathu, Kala lini u na hi girelago likhulo? Pwela wuhindzi sithumi sago.

¹⁴ Hi khurise khu lihaladzo lago na gu ngari dzimindru, gasi hi fela gutsaka hi embelela hi nengela matshigu yathu yatshavbo.

¹⁵ Hi ninge gutsaka nya guningane ni myaga yeyi hi wonidego sitshaniso.

¹⁶ Yeyedza wugulu nya tshivba yago ga sithumi sago ni sanana sathu si na wone wudhumo wago!

¹⁷ Wuhigo wa Pfhumu Nungungulu wathu, wu na fenengedze vbatshani gwathu; hi kategisele thumo nya mandza yathu; ina, tiyisa thumo nya mandza yathu.