Dzindzimo 9 - Bhibhiliya Nya Guage

Gubonga Nungungulu

Ga tsawa nya vaembeleli. Ndzimo ya Dhavhidhe

¹ Nyi na gu bonga, Pfhumu Nungungulu, khu monyo wangu watshavbo, nyi na huwelela mithumo yago yatshavbo!

² Nyi na tsaka nyi nengela khu uwe, nyi na dhumisa lina lago khu dzindzimo, uwe u khusegidego vbatshani ngudzu.

³ Wa gu vboha uwe, valala vangu va gu bwelela hwane, va tshunganela va mwalalega mbeli gwago.

⁴ Kholu uwe wa gu ema gumogo ni eni; u khade phathani u lamula khu nayo ni gululama.

⁵ U kawukide mayigo, u fuvisa vathu nya guvivbedwe khu monyo, u futide malina yawe kala gupindruga.

⁶ Valala va mbembide muphelo, madhoropa yawe ma di tshala marumbi basi, mwalo gambe a na gu va alakanyago.

⁷ Aholu, Pfhumu Nungungulu, a ngu fuma kala gupindruga, khade vbagikhalotunu gwaye nya gulamule mahungu.

⁸ Uye kamwe a ngu lamula litigo khu gululama, a lamula mayigo khu nayo.

⁹ Pfhumu Nungungulu a na khala wuthavelo wa vale va saniswago, a va hakha a va tiyisa vbakari nya sigaradzo.

¹⁰ Pfhumu Nungungulu, vatshavbo vatigo lina lago, va gu tumba uwe, kholu uwe gima khu digi avo va gu vbwetago.

¹¹ Embelelani ga Pfhumu Nungungulu, a vbanyago Siyoni, tivisani sigiro saye vbakari nya mayigo.

¹² Nungungulu a ngu alakanya avo va sanisekago, gima kha divaledwi khu gulila gwawe, a ngu tsayisa vasongi.

¹³ Nyi pwele wuhindzi, Pfhumu Nungungulu; wona wusiwana nyi giredwago khu vale va nyi vengago! Nyi wuse u nyi dusa kanani nya lufu.

¹⁴ Nyi fela gu embelela wuzundzo dzinyangwani ga gyagadzyana gya Siyoni, nyi nengela kholu u nga nyi vbanyisa.

¹⁵ Vathu nya mayigo va di thegela phalani va nga kembago, mawundru yawe ma di modwa khu mazinga va nga ma riyago vabune.

¹⁶ Pfhumu Nungungulu a dzi yeyedzide, khu gulamula gwaye nya gululame; oyu nya guvivbe monyo, a di konwa khu malipha yaye.

¹⁷ Va nya guvivbedwa khu monyo, va na dzudzugwa phalani nya vafi, gumogo ni vathu vatshavbo va si khathaligo khu Nungungulu.

¹⁸ Kholu gisiwana kha gi na divadwa muphelo, gutumba nya vathu nya gusolege kha gu na khala liphanga.

¹⁹ Pfhumu Nungungulu, wuga u nga digi muthu a gu yeyisa! Mayigo yatshavbo ma nate ma ta lamudwa mbeli gwago!

²⁰ Va thele hwanga, Pfhumu Nungungulu; va nya mayigo va na dziti gukhavo vathu basi.