Dzindzimo 80 - Bhibhiliya Nya Guage

Nombelo nya gulombe guvbahedzwa Israyeli

Ga muthangeli nya tsawa nya vaembeleli. Khu maembelo nya ndzimo nya “senge,” gialakanyiso gya Asafi

¹ Uwe muhavisi wa Israyeli, tula ndzeve, u yingisa, uwe u gimbidzisago va na Josefa kha nga tshambi wago; uwe u khadego vbagiluvelotunu, vbatshani nya dzikerubhimi, nonedza guwonegela gwago.

² Yeyedza wugulu wago ga lihundzu la Efrayimi, la Bhejami ni la Manasi, delu u ta hi vbanyisa.

³ Uwe Nungungulu, hi wusedze; ngangamedzisa khovbe yago, hi na vbanya.

⁴ Uwe Pfhumu Nungungulu nya Tshivba Yatshavbo, kala lini u na gorogelago nombelo wa vathu vago?

⁵ U hi thelede wusa nya marongo hi hodza, u hi ninga khokho nya gutale khu marongo hi sela.

⁶ U hi giride dzikhumbi, vaakelane vathu va ngu dwanisana khu kotani ya ethu, ni valala vathu va ngu hi hega.

⁷ Uwe Nungungulu nya Tshivba Yatshavbo hi wusedze; ngangamedzisa khovbe yago, hi na vbanya.

⁸ U wuyiside litshina nya wuvha khu tigoni ga Egipito, u tutumisa va nya mayigo u li yala tigoni gwawe.

⁹ U dongisede wulime gasi gu li yala umo, mikhamba yaye yi tsitside vbavbatshi nya mafu, li navide li enedza litigo latshavbo.

¹⁰ Li fenengedzide sigomo khu mutsa waye, matamo yaye ma vbindride gulapha nya sedhari wa Nungungulu.

¹¹ Matamo yaye ma di nava kala phwani, ni mathungedwa ma di vboha kala tsongoni nya wukhongolo.

¹² Khu ginani u nga khungumula libhiyo laye? Olu, vavbindri nya ndzila va gu bela va hava dziuvha.

¹³ Khumbakhabi ya gu li gandredzela khu migondro yaye, si hava umo sirengo satshavbo nya likhabi.

¹⁴ Uwe Nungungulu nya Tshivba Yatshavbo, hi ngu gu lomba wuya nyaluphye, khedzisa khu ndzadzini, u wona, u vhikela uvha yoyu;

¹⁵ Sayisa litshina leli u nga li yala khu mandza yago ya nyamudye, gibuga gegi u nga gi dandrisa.

¹⁶ Valala vathu va li kokide va li vbisa. Wona vathu vava, u va mbembisa khu likhulo lago.

¹⁷ Vhikela muthu wago u mu hathidego khu libogo lago la nyamudye, mwamana wa muthu u nga mu dandrisago.

¹⁸ Olu kha hi na hambana gambe nago; sayisa guvbanya gwathu, ethu hi na dhumisa lina lago.

¹⁹ Uwe Pfhumu Nungungulu nya Tshivba Yatshavbo, hi wuyise nyaluphye, ngangamedzisa khovbe yago, hi na vbanya.