Dzindzimo 75 - Bhibhiliya Nya Guage

Nungungulu muvbanyisi

Ga tsawa nya vaembeleli, khu maembelo nya ndzimo yi gu, khiyo: “U nga pfhungumuli.” Ndzimo ya Asafi

¹ Hi ngu gu bonga uwe Nungungulu; ethu hi ngu gu bonga, hi ngu rana lina lago, hi huwelela siliwugiso sago.

² Nungungulu a di khuye: Khu gikhati nyi gi vegidego nyi na lamula vathu khu gululama.

³ Li na ndrendremele litigo ni vathu va vbanyago umo, ambari khu guralo, nyi nga na gu tiyisa madingo yaye.

⁴ Nya gu embela vale va dzi khusedzago, kheni: Mu nga dzi khusedzi; ni va nya guvivbedwa khu monyo, kheni: Mu nga tumbi tshivba yanu.

⁵ Mu nga dzi zundzi khu tshivba yanu, mu nga ganeli khu matshandza.

⁶ Kholu giphaso kha giti khu Khugadambo mwendro khu Pfoladambo ambari, khu giwulani.

⁷ Nungungulu khuye mulamuli a gu neredza vambe, a khusedza vambe.

⁸ Mandzani ga Pfhumu Nungungulu gyomo gikombe gi tadego khu wadwa wu pupumago likhulo laye, a na ningago va sela vatshavbo va nya guvivba va tigoni va sela kala ni giminya gyakone.

⁹ A gu bani nari eni nyi na dhumisa Nungungulu kala gupindruga; nyi embelela dzindzimo nya gurungudze Nungungulu wa Jakobe.

¹⁰ Nyi na vbedza tshivba ya va nya guvivba; aholu tshivba ya va nya gululama yi na khusedzwa.