Dzindzimo 72 - Bhibhiliya Nya Guage

Nombelo nya gulombelele mufumeli

Ndzimo ya Solomoni

¹ Nungungulu, hevbudza mufumeli nya litigo malamulelo yago, ninga gululama gwago gyanana gya mufumeli.

² Gasi a lamula vathu vago khu lisine, ni gu sayisa sisiwana sago khu gululama.

³ Sigomo si na rese gurula ga vathu, sigomwana niso si na gu resa khu gululama.

⁴ Mufumeli a na lamule sisiwana khu gululama, a phasa sisiwana a gandredzela vatshanisi.

⁵ Uye a na vbanye matshigu nya gulaphe kha nga lidambo ni ngima, a wona situgulwana ni situgulwana.

⁶ Mufumeli a na khale nga ndzadzi yi wago wulimeni, a fanana ni ndzadzi yi thelago thomwa mafuni.

⁷ Gu na manege gululama matshiguni nya gufume gwaye, gurula gu na manege kala ngima wu si wonegi.

⁸ Mufumo waye wu na khugele linene kala linene, gukhugela tsongoni wa Ewufrate, kala mahegiso nya litigo.

⁹ Va na noge mbeli gwaye vathu va khalago giwulani, valala vaye va na dzi these mafuni migondroni gwaye.

¹⁰ Vafumeli va Tarisisi ni va sidwani va na rese miningelo nya gu mu luve; vafumeli va Sabha ni va Sebha, va na mu resele miningelo.

¹¹ Vafumeli vatshavbo va na khidzime mbeli gwaye; mayigo yatshavbo ma na mu thumele.

¹² Kholu uye a ngu bavbula marongo ya gisiwana gi lilago ni khulungu yi gu mwalo waye.

¹³ Uye a ngu pwela gisiro wule a vbedego tshivba, a vbanyisa womi wa sisiwana.

¹⁴ A ngu tshula wugumbini avo va tshaniswago ni gu ghevengwa, kholu novba wawe wu na ni lisima gwaye.

¹⁵ A na vbanye mufumeli, a na hakhe ndralama ya Sabha; va na mu girele milombelo khavbo gu si vbeligo, matshigu yatshavbo a kategiswa khu Nungungulu.

¹⁶ Tigoni gu na fumwe dzimbewu, dzi fenengedza kala vbatshani nya sigomo, si tala khu dzimbewu kha nga esi sa Libhanoni, avo va vbanyago madhoropani va na rumbuge kha nga mwasi wu fenengedzago thembweni.

¹⁷ Lina la mufumeli li na simame kala gupindruga ndruma yaye yi na pwale, yi na simame vbavbatshi nya lidambo; khavbo gwaye va na kategiswe vathu vatshavbo, mayigo ma na mu rane oyu a kategidego.

¹⁸ A na bongwe Pfhumu Nungungulu, Nungungulu wa Israyeli, kholu khuye basi a girago sisamadziso.

¹⁹ Lina laye nya wudhumo, li na simame kala gupindruga, wudhumo waye wu na tadze litigo latshavbo! Amen! Amen!

²⁰ Avba khu mahegiso nya milombelo ya Dhavhidhe mwamana wa Jese.