Dzindzimo 71 - Bhibhiliya Nya Guage

Nombelo wa lidhota nya gukari

¹ Nyi ngu thavela avbo gwago, Pfhumu Nungungulu; u nga nyi digi nyi thedwa dzitshoni.

² Nyi phase u nyi tshula kholu uwe u wadi! Nyi yingise u nyi vbanyisa.

³ Khala uwe giwindri nya wuthavelo wangu u gi dongisedego gasi nyi sayisega ga igyo; u rumede gukhuwe nyi vbanyiswa, kholu khuwe giwindri nya likhokhola langu.

⁴ Nungungulu wangu, nyi vbulugise mandzani ga va nya guvivba, mandzani ga va nya guvivba ni vatshanisi.

⁵ Kholu uwe Pfhumu Nungungulu, khuwe gitumbo gyangu, nyi tumbide uwe gukhugela wananani wangu.

⁶ Khuwe u nyi dusidego khu ndrani ga mayi wangu, khuwe u nyi phasedzelago gukhugela guvelegwani gwangu, eni nyi na gu dhumisa gikhati gyatshavbo.

⁷ Nyi gihegiso ga vathu nya vangi, aholu uwe khuwe wuthavelo wangu.

⁸ Nyi na gu dhumisa wutshigu ni mihani nyi embelela wudhumo wago.

⁹ U nga nyi nyenyi olu nyi gumbidego; u nga nyi dzudzugi olu nyi vbeledwego khu tshivba.

¹⁰ Kholu valala vangu va gu ganela guvivba khu eni; vale va vbwetago gu nyi songa va gu tshangana va luga gikungo,

¹¹ va ganela, khavo: “Nungungulu a mu digide;” mu lundreni hi mu mola, kholu mwalo nya gu mu vhikele.

¹² Nungungulu, u nga khali hwindzo ni eni, Nungungulu wangu, vbiredza u ta nyi phasa.

¹³ Va na thedwe dzitshoni va padwa avo va nyi wugelago avo a gu valala nya hefemulo wangu; va na poyidwe va thedwa dzitshoni vale va golago gu nyi wona na nyi gutshaniseka.

¹⁴ Aholu, eni nyi na vega gwago gutumba gwangu, nyi na simama gu gu dhumisa gikhati gyatshavbo.

¹⁵ Wutshigu ni mihani khu guvbanyisa gwago nyi huwelela mithumo yago nya gululame ambari nyi gumba wuti tengo waye.

¹⁶ Nyi na wonegisa mithumo ya tshivba yago Pfhumu Nungungulu; nyi huwelela gukheni uwe basi khuwe u gu wadi

¹⁷ U nyi hevbudzide uwe Nungungulu, gukhugela wananani wangu; kala na muhuno nyi ngu tivisa siliwugiso sago.

¹⁸ Ambari olu nyi gumbidego na nyiri ni dzinvi, u nga nyi digi Nungungulu wangu; kala nyi huwelela tshivba yago ga melego yoyu, ni ga oyu wu nga gutago.

¹⁹ Gululama gwago, Nungungulu, gu ngu khusega kala ndzadzini. Uwe Nungungulu U giride silo nya sikhongolo ngudzu, khu mani nya gufanane ni uwe?

²⁰ Uwe u nyi vbindriside khu vbakari nya sigaradzo ni mabango nya gutale, u na nyi vbanyisa nyaluphye, u nyi dusa vbakari nya lufu.

²¹ U na engedzela wugulu wangu, u bwelo khavbo u nyi tangadzisa nyaluphye.

²² Gasi eni nyi na gu dhumisa khu gitendre, nyi embelela gululama gwago uwe Nungungulu wangu; nyi embelela dzindzimo khu gitendre, uwe u Agidego wa Israyeli.

²³ Nyi na womba mikulungwane, nyi embelela khu dzindzimo Hefemulo wangu wu na ghiya kholu u wu dzegisidego.

²⁴ Wutshigu ni mihani nyi na ganela khu wuwadi wago; kholu avo va nga vbweta gu nyi songa, va poyidwe ni gu thedwa dzitshoni.