Dzindzimo 70 - Bhibhiliya Nya Guage

Gulomba guphaswa khu Nungungulu

Ga muthangeli nya vaembeleli. Ndzimo nya wuembeleli wa Dhavhidhe

¹ Pfhumu Nungungulu, delu khu givbiredza u ta nyi vbanyisa; vbiredza, Pfhumu Nungungulu, u ta nyi tshudzisa.

² Va na poyilege ni gu thega dzitshoni avo va vbwetago gu nyi songa; va na bwelele hwane khu dzitshoni avo va tsakago khu gu nyi wona na nyi gu tshaniseka.

³ Va na bwelele hwane khu dzitshoni dzawe, avo va gukhavo: “Khavbo gwadi! Khavbo gwadi.”

⁴ Avo va golago guvbanyiswa gwago ni gu gu vbweta; va na tale khu gunengela gikhati gyatshavbo va na ganele, khavo: “A na khusedzwe Nungungulu!”

⁵ Eni nyi gisiwana ni muhamugi; uwe Nungungulu, vbiredza u ta gwangu kholu khuwe muphasi ni muvbanyisi wangu. U nga hweli Pfhumu Nungungulu!