Dzindzimo 63 - Bhibhiliya Nya Guage

Gugola Nungungulu

Ndzimo ya Dhavhidhe, nari giwulani gya Judheya

¹ Nungungulu, uwe u Nungungulu wangu; nyi ngu gu vbweta khu tshivba. Hefemulo wangu wu na ni lidora nya uwe, eni wurumba wangu nyi ngu gu vbweta ngudzu; kha nga mafu nya gihala ma gu na ni lidora nya mati.

² Eni nya gu gu khedzisela makhuvini gwago nya guage, gasi gu wona tshivba ni wudhumo wago.

³ Kholu lihaladzo lago li ngu tsakisa guvbindra womi; likana langu li na gu rungudza.

⁴ Khu guralo, nyi na gu rungudza na nyi nga gu vbanya; matshigu yatshavbo nya guvbanye gwangu, nyi na khusedza mandza nyi gu bonga.

⁵ Nya gu dzipwa gutsaka gukhwatshi nyi di khura khu guhodza nya gunone, nyi na womba mikulungwane nya gutsake nyi gu rungudza.

⁶ Na nyi lade dawuni gwangu, nya gu alakanya uwe, wutshigu watshavbo nya gu pila na nyi gu pimisa uwe.

⁷ Kholu u khade wuthavelo wangu, nya gu nengela mutsani nya mambapi yago.

⁸ Nyi ngu namarela gwago khu hefemulo wangu watshavbo, mandza yago ya nyamudye ma ngu nyi seketela.

⁹ Aholu vale va vbwetago gu nyi songa, va na thegela phalani nya guete nya vafi.

¹⁰ Va na songwa khu matshari, va hodzwa khu migehe.

¹¹ Mufumeli nya litigo a na nengele ga Nungungulu; uye a sambanyago linani ga Nungungulu a na nengela, aholu avo va liphago va na segwa magana.