Dzindzimo 60 - Bhibhiliya Nya Guage

Nombelo wa gikhati nya nyimbi

Ga muthangeli nya tsawa nya vaembeleli, khu maembelo nya ndzimo yi gu, khiyo: “Senge nya wufakazi.” Ndzimo ya Dhavhidhe gasi gu hevbudza. Avbo a nga dwana ni Vaasiriya va Mesopotamiya ni Vaasiriya va Zobha, ni avbo Jowabhi a nga wuya khiyo nya gusasele vathu va Edhomi nya tengo nya likhumi na mavili magumi mazana (12.000) vama, Kovani nya Munyu

¹ Uwe Nungungulu, uwe u hi digide u hi phalalegisa; kholu u di tade khu likhulo khu ethu; gasi olu hi ninge gambe tshivba!

² U dzudzide litigo li gu nwega; gasi olu sega malufa yaye, kholu li ngu pfhungumuga.

³ U giride vathu vago va wona sigaradzo nya singi, u hi sedzide wadwa gasi hi leva.

⁴ U ningide ngavbya avo va gu ningago githawo, gasi va vbuluga ga gighalala gya nala.

⁵ Hi vbanyise khu gyandza gyago u hi hakha, gasi sigodwa sago si vbuluga.

⁶ Nungungulu ganede khu nyumbani gwaye nya guage, khuye: Nyi na nengela khu gu kabanisa litigo la Sikemi nyi kavedzela vathu va Sukoti.

⁷ Va Ghiligali vathu vangu, va na Manasi vathu vangu; Efrayimi gihugu gyangu nya nyimbi; Judha khuye ndronga yangu nya wufumu.

⁸ Aholu litigo la Mowabhi, ginamelo gyangu nya guhambe khigyo; Nyi na rinya silato sangu tigoni ga Edhomi; nyi ghiya khu gu pala Vafilisitiya.

⁹ Khu mani a na gu nyi yisago dhoropani nya likhokhola? Khu mani a na gu nyi yisago kala Edhomi?

¹⁰ Ina khuwe uwe Nungungulu u hi digidego, gani? U si thangeli gambe dzinyimbi dzathu!

¹¹ Hi phase u hi dwanela ga valala vathu, kholu tshivba nya vathu va mafuni kha yi hi phasi ni gu hi vbulugisa.

¹² Nungungulu a na ema ni ethu hi pala, khuye a na gu gandredzelago valala vathu.