Dzindzimo 56 - Bhibhiliya Nya Guage

Nombelo wa muthu a tumbago basi Nungungulu

Ga muthangeli nya tsawa nya vaembeleli. Khu maembelo nya ndzimo yi gukhiyo: “Lituva li pwalago simboni nya wukhongolo wa hwindzo.” Ndzimo ya Dhavhidhe gikhati a modwego khu Vafilistiya tigoni ga Gati

¹ Nyi pwele wusiwana Nungungulu wangu, kholu vathu va ngu vbweta gu nyi bayisa; va gu nyi tshanisa ni gu nyi dwanisa litshigu latshavbo.

² Avo va gu nyi holelela gikhati gyatshavbo; vangi va dzi gugumugisago va nyi dwanisa.

³ Nya gupwa hwanga, nya gu tumba uwe basi.

⁴ Khu kotani nya situmbiso Saye, nyi ngu tumba Nungungulu, kha nyi thavi gilo, va na nyi gira ginani vathu?

⁵ Gikhati gyatshavbo va gu nyi payetela khu magana; va gu luga mano nya gu nyi bayise.

⁶ Va gu tshangana va sihala, va nyi holela umo nyi gimbilelago umo, na va gu virela gikhati nya gu nyi songe.

⁷ Ina va na vbuluga vathu nya guvivbe, gani? Oh, Nungungulu tsayisa ava vathu khu likhulo lago.

⁸ Uwe u gutide gusaniseka gwangu; u hengeledzede marongo yangu gyomboni; ina khwa si lova libhukuni gwago, gani?

⁹ Litshigu nyi na gu gu lombago gu nyi phasa, valala vangu va na bwelela hwane va thava; eni nyi ngu dziti gwadi gukheni Nungungulu a na ni eni.

¹⁰ Nyi ngu rungudza Nungungulu, khu kotani nya situmbiso Saye,

¹¹ Nyi ngu vega gitumbo gyangu ga Nungungulu, kha nyi thavi gilo, va na nyi gira ginani vathu?

¹² Nungungulu, nyi na gira satshavbo nyi sambanyidego avbo Gwago; nyi na gira phaso nya gubonge.

¹³ Khu guralo, u vbulugiside hefemulo wangu tshivbani nya lufu, khwa dzumedzisa gukhuwe nyi tshunganela nyi thega, nyi gimbile mbeli gwago Nungungulu, gasi nyi gimbila wenengedzoni nya guvbanye.