Dzindzimo 52 - Bhibhiliya Nya Guage

Gulamudwa ga muthu nyambasi wadi

Ga muthangeli nya tsawa nya vaembeleli. Ndzimo ya Dhavhidhe a embidego gikhati Dhowegi, muedhomi a nga ta tivisa Sawule, khuye: “Dhavhidhe bede nyumbani ga Abhimeleki.”

¹ Khu ginani u dzi zundza khu mithumo yago nya guvivbe, uwe u gu ni tshivba? Kholu wuwadi wa Nungungulu wu ngu simama kala gupindruga.

² Lidimi lago la gu luga makungo nya guvivbe; kha nga ngala nya gulodzwe, la gu luga wukanganyisi.

³ Wa gu gola ngudzu guvivba guvbindra wuwadi, wa gu gola malipha guvbindra lisine.

⁴ Wa gu tsakiswa basi khu magana nya gumbembise, uwe u gu ni lidimi nya wudambane.

⁵ A nuye Nungungulu a na gu mbembisa kala gupindruga; a na gu dzega a gu tutumisa nyumbani gwaye a gu fuvisa tigoni nya vathu nya guvbanye.

⁶ Va nya gululama va na wona satshavbo soso, va na thava, ni gu mu hega, khavo:

⁷ “Wonani muthu a ngamba tumba Nungungulu kha nga muvhikeli waye; aholu a nga bani a tumba talo nya dzithomba dzaye, a dzi tiyisa khu wukanganyisi waye!”

⁸ Gasi eni, nyi na gira kha nga ngure nya gunyuge, Nyumbani ga Nungungulu; nyi ngu tumba wuhindzi wa Nungungulu matshigu yatshavbo kala gupindruga.

⁹ Nyi na gu bonga gikhati gyatshavbo, khu satshavbo nya sadi u nyi giredego; mbeli nya sihathwa sago nyi na rungudza lina lago, kholu lina khyadi ngudzu.