Dzindzimo 5 - Bhibhiliya Nya Guage

Nombelo nya dzimindru

Ga vathangeli nya tsawa nya vaembeleli khu gitoliyo. Ndzimo ya Dhavhidhe

¹ Pfhumu Nungungulu, yingisa magana yangu, upwa nombelo wangu.

² Hakha lito nya gulile gwangu, uwe Pfhumu ni Nungungulu wangu. Nya gu lomba gwago.

³ Pfhumu Nungungulu, vbadzimindrutunu u napwa lito langu, vbadzimindrutunu, nyi ngu gu bikela nombelo wangu, nyi khevisela phindrulo yago.

⁴ Kholu uwe khuri Nungungulu nya gugole guvivba, muthu nya guvivbe monyo, kha khali vbafuvbi gwago.

⁵ Va nya matshandza, kha va tiyeli gu khedza khovbe yago. U ngu va nyenya vatshavbo va girago guvivba.

⁶ U ngu fuvisa va nya malipha, Pfhumu Nungungulu a ngu nyenya gighevenga ni muthu nya wuvafa.

⁷ Gasi eni, khu lihaladzo lago nya likhongolo, nyi ngu bela nyumbani gwago; nyita khidzima nyi gu khozela khu githawo nyumbani gwago nya gukatege.

⁸ Pfhumu Nungungulu, nyi gimbidzise khu gululama gwago, khu kotani ya valala va nyi holelelago; lulamisa ndzila yago mbeli gwangu!

⁹ Kholu va mwalo lisine maganani gwawe; myonyo yawe yi tade khu maalakanyo nya guvivbe; migolo yawe marowo ma tulegidego, malimi yawe ma gu songa.

¹⁰ Pfhumu Nungungulu, va rwege nandru wawe, va na thege khu makungo yawe, va tutumise khu kotani nya sighoho sawe nya singi, kholu va ngu gu wugela.

¹¹ Va na nengele vatshavbo va thavelago avbo gwago, va na kulungele kala gupindruga; uwe u ngu va vhikela, avo va nengela khu uwe, avo va golago lina lago.

¹² Khu kharato, uwe Pfhumu Nungungulu, u ngu kategisa oyu a lulamidego u ngu mu vhikela maphuvbo yatshavbo khu gitshangu nya wuhigo wago.