Dzindzimo 45 - Bhibhiliya Nya Guage

Gihathwa gya Nungungulu ni mwangadzi waye

Ga muthangeli nya tsawa nya vaembeleli. Ndzimo ya sanana sa Kore. Ndzimo nya lihaladzo

¹ Monyo wangu wu ngu vbalagela khu magana nya gutsakise. Ndzimo yeyi nya gu yi embelela ga Mufumeli; lidimi langu tenga wa mulovi nya gusamadzise.

² Uwe khuwe nya gumbure ngudzu vbakari nya sanana nya vathu; wuhigo wu ngu duga khu kanani gwago; khu guralo, Nungungulu a ngu gu kategisa kala gupindruga.

³ Hunga litshari giwununi gwago, uwe ndrena; kholu u ngu zundzega ni guthavisega!

⁴ Khilela kavalu nya gupale, u ya dwanela lisine ni gululama; libogo lago la nyamudye li na gu hevbudze gu gira siliwugiso.

⁵ Siholoma sago si lodzidwe, si ngu hekha monyo wa valala va Mufumeli; mayigo yatshavbo ma nguta khoza avbo gwago.

⁶ Uwe Nungungulu, gikhalo gyago nya wufumu gi ngu simama kala gupindruga; ndronga nya gululame, i ndronga nya wufumu wago.

⁷ U ngu gola gululama, u nyenya guvivba; khigyo gi nga girago Nungungulu wago a gu todza khu mafura nya gunengele, guvbindra vatshavbo u palisanago navo.

⁸ Guambala gwago gwatshavbo gu ngu bhumudziswa khu mafura nya mira, haluwe ni kasiya. Dzindzimo nya guembeledwe khu sitendre dzi ngu tsakisa dzinyumbani ga vafumeli, nya gugirwe khu magwaha nya dzindzofu.

⁹ Vbakari ga vanyamayi va nyumbani nya wufumu somo sanana nya dzimbiri dza vafumeli, nyamudye gwago yi emide pfhumugadzi yi mburisedwego khu ndralama nya guhutwe ya Ofiri.

¹⁰ Upwa, nyamahegyane; wona u yingisa gwadi; diga vathu vago, u va divala gumogo ni ndranga ya babe wago.

¹¹ Khu wumburi wago, Mufumeli a vbede mapimo yaye yatshavbo; noga mbeli gwaye; kholu uye khuye mune wago.

¹² A nata gwago nyamahegyane wa dhoropani ga Tiro a resa dzisagwati; avo va fumidego va nata gu luva gasi u kodza gu va girela wuhindzi.

¹³ Nyamahegyane nya gumbure ngudzu, gyanana gya Mufumeli a ngu bela nyumbani nya wufumu; na ambade guambala nya gumburisedwe khu ndralama.

¹⁴ Va ngu mu yisa mbeli ga Mufumeli na ambagisidwe dzingandzu nya gulugedwe; a ngu vbelegedzwa khu dzimbiri dzikwawe nya makendzi, va di bela vatshavbo.

¹⁵ Va ngu bela nyumbani ga Mufumeli; na va gu kulungela ni gutsaka.

¹⁶ Wulangani wa vavelegi vago, u na velega sanana nya singi, u na si gira vafumeli nya litigo latshavbo.

¹⁷ Lina lago nyi na li gira li alakanywa khu mimela ni mimelana, mayigo ma na gu rungudza gikhati gyatshavbo kala gupindruga.