Dzindzimo 44 - Bhibhiliya Nya Guage

Gulomba tshivba ga Nungungulu

Ga muthangeli nya tsawa nya vaembeleli. Ndzimo ya sanana sa Kore

¹ Nungungulu, hi pwide, ethu habune na va gu ganela, vababe vathu va hi embeledzede, siliwugiso u giridego matshiguni yawe ya gale.

² Uwe khu mandza yago u tutumiside mayigo u fela gu emisa vababe vathu; u tshaniside mahundzu, gasi gu dandrisa vababe vathu.

³ Khandri khu tshivba nya matshari va nga wandra khiyo litigo, gambe khandri mawogo yawe ma nga va ninga gupala; aholu khu libogo lago la nyamudye, ni wenengedzo nya khovbe yago, kholu u di gu va gola.

⁴ Nungungulu, uwe khuwe Pfhumu yangu, ninga Jakobe gupala.

⁵ Khu tshivba yago hi vetide valala vathu; khu lina lago hi gandredzela khu migondro vatshanisi vathu. Avo va nga bani va hi wugela.

⁶ Kha nyi tumbi wulaho wangu, ambari litshari langu khandrilo li nyi vbanyisago.

⁷ Kholu khuwe u nga hi vbanyisago ga valala vathu, u va fenengedza khu dzitshoni avo va hi vengago;

⁸ Ethu gikhati gyatshavbo ha gu dzi khusedza tshivbani ga Nungungulu, hi na simama gu rungudza lina lago.

⁹ Gasi olu, uwe u hi tsukude u hi thela dzitshoni, khu dugi gambe u thangela dzinyimbi dzathu.

¹⁰ Wa gu hi diga hi tutuma mbeli ga valala vathu, valala vathu va gu hi phanga khu edzi va dzinago khidzo.

¹¹ Uwe u hi ningede kha nga dzinvuta nya guye gusindzwatunu u hi phalalegiside vbakari nya mayigo.

¹² Wa gu rengisa vathu khu tengo nyamba phasa gilo, gi mwalo u wuyedwago khigyo avbo nya tengo yoyo.

¹³ Wa gu hi gira givalo ga vaakelane vathu, avo va hi randrelago va ngu hi hembulula, va hi hega;

¹⁴ U ngu hi gira tekatekane ga va nya mayigo, vathu va gu hi wona va gu khiniga mihungo.

¹⁵ Matshigu yatshavbo nya gu wona dzitshoni dzangu; nyi fenengedzwa khovbe yangu khu dzitshoni,

¹⁶ khu kotani nya magana nya givalo ni gu hembulula, mbeli ga nala ni muphodzeli.

¹⁷ Satshavbo sesi si dugelede, aholu kha hi gu divali, ambari gu yeyisa gidzumeledzwano gyago.

¹⁸ Monyo wathu kha wa bwelela hwane, migondro yathu kha ya ndreya ndzilani gwago,

¹⁹ gasi gu hi pfara avbo yi vbanyago migehe, u hi fenengedza khu gidema nya lufu.

²⁰ Naripwani hi di divala lina la Nungungulu wathu, hi khusedza mandza hi lombelela ga nungungulu nya mayigo,

²¹ ina Nungungulu a sa hi tugula gani, uye a yitigo misihalo ya myonyoni, gani?

²² Aholu khu kotani nya gu gu haladze, hi ngu songetedwa matshigu yatshavbo, va hi gira kha nga dzinvuta nya guye gusindzwatunu.

²³ Wuga! Khu ginani u lalago, Pfhumu? Wuga! U nga hi nyenyi kala mahegiso!

²⁴ Khu ginani u sihago khovbe yago, u divala sisaniso ni wusiwana wathu?

²⁵ Kholu hi vetidwe hi thega vbavbatshi hi khala kudzudzwane, hi khwirira vbavbatshi khu lididi.

²⁶ Khuga u ema; gasi u hi phase! Hi dzegise khu lihaladzo nya wuwadi wago.