Dzindzimo 4 - Bhibhiliya Nya Guage

Gutumba Nungungulu gikhatini nya wuvi

Ga muthangeli nya vaembeleli khu gitendre. Ndzimo ya Dhavhidhe

¹ Nya gu gu rana nyi hakhe; uwe Nungungulu mulamuli wangu! Uwe u nga nyi vbulugisa musigaradzoni, nyi pwele wuhindzi u hakhe nombelo wangu!

² Enu vathu, kala lini sanu, na mu gu hembulula wuzundzo wangu! Khu ginani mu gola silo nyamba phasa gilo, mu tutumela gu vbweta malipha?

³ Dzitini gukhenu Pfhumu Nungungulu a dzi hathede oyu a khodwago gwaye. Pfhumu Nungungulu a ngu nyipwa nya gu mu rana.

⁴ Thavani mu nga ghohi gambe, pimisani khu myonyoni gwanu na mu lade mu dzi rudzisa.

⁵ Ningelani miphaso nya gululame, mu tumba Pfhumu Nungungulu.

⁶ Nya vangi vari, khavo: “Khu mani a na hi nonedzago gutsaka?” Pfhumu Nungungulu, hi wenengedze khu gungangamela nya khovbe yago.

⁷ U thede gutsaka nya gungi monyoni gwangu guvbindra avo va gu nago; va fumago sivbila ni vbinyu.

⁸ Nyi ngu lala ligovbe nyi hefemula khu gurula, kholu, uwe Pfhumu Nungungulu khuwe basi u nyi ningago guvbanya na nyi tiyide.