Dzindzimo 34 - Bhibhiliya Nya Guage

Gudhumisa wuwadi wa Pfhumu Nungungulu (1 Sam 21:13-15)

Ndzimo ya Dhavhidhe, gikhati a nga dzi gira muthu nya guhandruge mbeli ga Abhimeleki, a tutumiswa khuye, a khuga a hongola

¹ Nyi na rungudza Pfhumu Nungungulu gikhati gyatshavbo, Likana langu li na embelela wudhumo waye kala gupindruga.

² Hefemulo wangu wu na dzi zundza khu Pfhumu Nungungulu, avo va dzi nogisago va napwa va nengela.

³ Rungudzani Pfhumu Nungungulu gumogo ni eni, hi na khusedze lina laye ethu hatshavbo.

⁴ Nyi vbwetide Pfhumu Nungungulu, uye a nyi hathide; a nyi tshula guthavani gwangu gatshavbo.

⁵ Avo va mu wonago va na tala khu litsako, dzikhovbe dzanu gima kha dzi na khala dzitshoni.

⁶ Gisiwana gi di lila, Pfhumu Nungungulu a gi yingisa, a gi vbulugisa sigaradzoni saye satshavbo.

⁷ Ngilozi ya Pfhumu Nungungulu ya gu vhikela vale va mu ningago githawo yi va vbanyisa.

⁸ Lingani mupwa edzi Pfhumu Nungungulu a gu wadi khidzo; kategide wule a thavelago avbo gwaye.

⁹ Ningani githawo Pfhumu Nungungulu enu sihathwa saye, kholu gimwalo gi na kenelelago ga avo va mu ningago githawo.

¹⁰ Singhalana si ngu hamuga sipwa ndzala, Aholu gimwalo gi kenelelago ga avo va vbwetago Pfhumu Nungungulu.

¹¹ Vanavangu deluni muta nyi yingisa; eni nyi na mi hevbudzani githawo ga pfhumu Nungungulu.

¹² Khu wevbini muthu a vbwetago guvbanya, a golago guvbanya matshigu nya gulaphe gasi gu wona silo nya gutsakise?

¹³ Vegedza lidimi lago ga esi nya guvivbe, likana lago li nga ganeli malipha.

¹⁴ Ndreya ga esi nya guvivbe, u gira nya sadi; vbweta gurula u gu landrisa.

¹⁵ Maho ya Pfhumu Nungungulu ma gu khedzisela avo va lulamidego; dzindzeve dzaye dza gu yingisela gulila gwawe.

¹⁶ Khovbe ya Pfhumu Nungungulu ya gu wugela avo va girago guvivba, gasi a va fuvisa mafuni va si alakanywi gambe.

¹⁷ Va nya gululama va gu lila, Pfhumu Nungungulu a gu yingisa, a va tshula sigaradzoni sawe satshavbo.

¹⁸ Pfhumu Nungungulu womo vbafuvbi ga vale myonyo yawe yi vbisegago, a vbanyisa avo mihefemulo yawe yi khuvekidego.

¹⁹ Sigaradzo nya muthu nya gululame singi ngudzu, aholu Pfhumu Nungungulu a gu mu vbulugisa ga satshavbo.

²⁰ Uye a gu sayisa marambo yawe yatshavbo, gasi ni limwedo lawe basi li si fanywi.

²¹ Muthu nya guvivbedwe khu monyo a gufa khu wuvivbi waye, ni avo va vengago muthu nya gululame va na tsayiswa.

²² Pfhumu Nungungulu a ngu dzegisa mihefemulo ya sithumi saye, ni vale va tumbago uye, gima kha va na tsayiswa.