Dzindzimo 32 - Bhibhiliya Nya Guage

Makategwa nya muthu a ditshedzwago sighoho

Ndzimo nya gihevbudzo ya Dhavhidhe

¹ Kategide wule a divaledwago sighoho saye, wule giwono gyaye gi futidwego.

² Kategide muthu wule, a si wonwigo nari ni nandru khu Pfhumu Nungungulu; wule a gu mwalo mahingigedzo nya wukanganyisi.

³ Gikhati nyi nga degula, marambo yangu ma di banga, khu gudilela gwangu nya matshigu yatshavbo.

⁴ Kholu wutshigu ni mihani mandza yago ma di nyi lemela, tshivba yangu yi di vbela khu guvbisa nya lihani.

⁵ Nyi dawulede gwago giwono gyangu, kha nya gu sihela guvbanya gwangu; eni nyi di ganela, kheni: “Nyi ngu hongola ga Pfhumu Nungungulu, nyi ya dawulela guvivba gwangu!” Uwe u di handza guvivba gwangu, u nyi divalela guvivba nya gighoho gyangu.

⁶ Khu guralo, watshavbo uye a gu gihathwa gyago, a na lomba gwago gikhati nya sigaradzo, wa gu manega talo nya ndrambi, uye gima kha na vbohedwa khuwo.

⁷ Uwe u wuthavelo wangu; u ngu nyi vbulugisa sigaradzoni, nyi gire nyipwa basi dzindzimo nya gupale.

⁸ Nyi na gu hevbudza nyi gu nonedza ndzila u na yi landrago; nyi na gu khedzisela, nyi khala singalagadzi wago.

⁹ U nga giri kha nga kavalu mwendro buru, a gu sirengo nyambana mapimo, si kodzwago basi khu gu thedwa matomu ni khalo; nyambana iso, gima kha si hidzimeli vbafuvbi gwago.

¹⁰ Va nya guvivbedwe khu myonyo va ngu wona sisaniso nya singi, aholu lihaladzo la gu furumedza avo va tumbago Pfhumu Nungungulu.

¹¹ Nengelani ga Pfhumu Nungungulu, kulungelani enu va nya gululama, embelelani dzindzimo nya gutsake, enu mwatshavbo nya myonyo nya yadi.