Dzindzimo 31 - Bhibhiliya Nya Guage

Nombelo vbakari nya sigaradzo

Ga muthangeli nya tsawa nya vaembeleli. Ndzimo ya Dhavhidhe

¹ Pfhumu Nungungulu, eni nyi nguta sihala avbo gwago; nyi nga khali dzitshoni; nyi vbulugise, khu gululama gwago nyi tshule.

² Neredza dzindzeve dzago eno gwangu, u nyi vbanyisa khu guvbiredza; khala giwindri nya wuthavelo wangu, likhokhola nya gu nyi vbanyise.

³ Aholu khuwe libhiyo langu; khu lina lago nyi endredze u nyi nonedza ndzila.

⁴ Nyi duse dzikhogani va nyi thesedego, kholu khuwe tshivba yangu.

⁵ Mandzani gwago nyi ngu ningela hefemulo wangu; uwe khuwe u nyi dzegisago, Pfhumu, Nungungulu nya lisine.

⁶ Eni nyi ngu va nyenya avo va khozelago vanungungulu nya liphanga; gasi eni nya gu tumba uwe Pfhumu Nungungulu.

⁷ Nyi na nengela nyi tsaka khu lihaladzo lago, kholu u wonide tshanisa yangu, u tide gusaniseka nya hefemulo wangu.

⁸ Khwa nyi ningela mandzani ga valala, u tiyiside migondro yangu wulangani nya guaname.

⁹ Nyi pwele wusiwana, Pfhumu Nungungulu, kholu nyi womo gusanisekani; wuvi wu ngu hodza maho yangu, hefemulo ni givili gyangu, si ngu wu na.

¹⁰ Kholu womi wangu wu ngu vbela khu gusaniseka, myaga yangu khya gu dilela; tshivba yangu yi ngu vbunguga khu wumbwa ni marambo yangu ma khuyugede.

¹¹ Khu kotani nya vatshanisi vatshavbo nyi gu navo, nyi khade givalo; ga vaakelane vangu nyi khade wa gu gunyenyeza, ga dzipari dzangu nyi khade gighevenga. Avo va nyi wonago ndzilani, va gu thava va ndreya hwindzo ni eni.

¹² Va nyi divade kha nga muthu a fudego; nyi womo kha nga gyombo gi pandridwego.

¹³ Nya gupwa milembo nya vathu nya vangi; nyi tala khu hwanga. Avo va gu tshangana va nyi lemba, va gu luga mano nya gu nyi songe.

¹⁴ Aholu, eni nya gu tumba uwe Pfhumu Nungungulu, nyari, kheni: Uwe khuwe Nungungulu wangu.

¹⁵ Matshigu yangu momo mandzani gwago; nyi tshule mandzani ya valala ni vatshanisi vangu.

¹⁶ Nyi nonedze gungangamela nya khovbe yago; u nyi vbanyisa khu lihaladzo lago.

¹⁷ Pfhumu Nungungulu, nyi nga khali dzitshoni gu gu rana; va nya guvivbedwa khu myonyo va na khale dzitshoni, va na degule va relela phalani nya vafi.

¹⁸ Ma na dumare magana ya vakanganyisi, ma ganelago guvivba khu muthu nya gululame, khu matshandza ni linyenyo.

¹⁹ Pfhumu Nungungulu, wuhindzi wago wukhongolo ngudzu, wa gu wu vegela vale va gu ni githawo ga uwe, u wu ningela ga vale va thavelago avbo gwago, uwo u wu thumisago mbeli nya vathu.

²⁰ Uwe u na va siha sihaloni nya khovbe yago, hwindzo nya mayunga nya vathu u gu va siha tshatshani gwago, hwindzo nya malimi ma fakazago malipha.

²¹ A na rungudzwe Pfhumu Nungungulu kholu a nyi girede siliwugiso nya lihaladzo, dhoropani nya gubhiywe.

²² Eni, vbakari nya gudilele gwangu, nyi di, kheni: “Nyi dusidwe nyi vegwa hwindzo nya maho yago.” Aholu uwe u di yingisa lito nya gilombo gyangu, gikhati nyi nga lila nyi gu rana.

²³ Golani Pfhumu Nungungulu, enu mwatshavbo sihathwa saye. Pfhumu Nungungulu a ngu sayisa ava va tumbegidego, aholu a ngu tsayisa khu tshivba va nya matshandza.

²⁴ Tiyani, mu tiyisa myonyo yanu, enu mwatshavbo mu tumbago Pfhumu Nungungulu.