Dzindzimo 144 - Bhibhiliya Nya Guage

Ndzimo nya gubonge khu gupala

Ndzimo ya Dhavhidhe

¹ A na bongwe Pfhumu Nungungulu, muvhikeli wangu, uye a nyi hevbudzago gu dwana ni gu gira nyimbi;

² uye khuye mutangadzisi, likhokhola ni wuthavelo wangu; khuye mudzegisi ni muvhikeli wangu nya gu mu tumbe, khuye a nyi ningago tshivba nya gufumele wathu.

³ Pfhumu Nungungulu, ginani muthu nya gukala u mu alakanya? Mwamana wa muthu ginani nya gukala u mu khathalela?

⁴ Muthu a gu fanana ni phuvbo yi furugedzago, matshigu yaye nya guvbanye ma gu vbindra kha nga mutsa.

⁵ Pfhumu Nungungulu, reledza ndzadzini u tshiga; kuha sigomo si tuviga wutshi.

⁶ Rumela mabara yago u phalalegisa valala vangu; khwandra siholoma sago u va phalegisa va thava.

⁷ Khu vbatshani yoyo u guromo, thawuludza libogo lago, u nyi vbanyisa ni gu nyi dusa nondrwani nya mati; u nyi vbulugisa tshivbani ya va nya mayigo.

⁸ Magana yawe ma gu kodza gu ganela malipha basi, ambari va gu sambanya khu gukhusedza libogo lawe la nyamudye, va gu lipha basi.

⁹ Gwago uwe Nungungulu, eni nyi na emba ndzimo nya yiphya nyi gu dhumisa, nyi na emba nyi gu rungudza khu gitendre nya likhumi dzingodzi.

¹⁰ Khuwe u ningago tshivba nya gupale vafumeli, u vbulugisa githumi gyago Dhavhidhe, gu songwa khu litshari la valala.

¹¹ Nyi vbulugise tshivbani ya va nya mayigo, avo va gambago malipha khu kanani gwawe, gyandza gyawe gya nyamudye, gya gu sambanya malipha.

¹² Sanana sathu nya sikhwathana, wudzahani gwawe, si na dandre nga misimbo yi nyugago, ni vanyamahegyane vathu, va na fanane ni siwindri nya madingo, nya guvatwe si mburisedwa nga madingo ya nyumbani nya dzipfhumu.

¹³ Sithunga sathu si na tale khu mihandro yatshavbo; sifuyo sathu si na velegelane si tala, gu manega mazana ni mazana mapanini gwathu;

¹⁴ dzimombe dzathu dzi na have gwadi dzi nona, gu nga beli gambe valala tigoni gwathu, gu nga manegi gambe dzihuwa nya gililo mitendrelani gwathu.

¹⁵ Va kategide vathu va manago mathomo yaya, va kategide vathu Pfhumu, a gu Nungungulu wawe.