Dzindzimo 143 - Bhibhiliya Nya GuageNombelo nya gulombe guphaswa Ndzimo ya Dhavhidhe 1 Pfhumu Nungungulu, hakha nombelo wangu, neredza ndzeve u yingisa gulila gwangu, nyi hakhe khu gululama ni gutumbega gwago. 2 U nga nyi thethisi eni githumi gyago, kholu, mwalo muthu a vbanyago nari mwalo nandru mbeli gwago. 3 Kholu nala a gu nyi sanisa a nyi gandredzela vbavbatshi; a nyi gurumedza gu vbanya wulangani nya gidema, kha nga avo va fudego khu gale. 4 Kholu, hefemulo wangu wu vbede tshivba ndrani gwangu, nya gupwa monyo wu titivala khanani gwangu. 5 Nyi ngu dundruga matshigu ya gale, nyi ngu pimisela mithumo yago yatshavbo, nyi ngu alakanya siliwugiso u giridego khu mandza yago. 6 Nyi ngu khusedza mandza yangu iyo gwago nyi lombelela, kha nga mafu nya gihala ma bangidego, hefemulo wangu wu na ni lidora nya uwe. 7 Olu Pfhumu Nungungulu, vbiredza u nyi hakha; nyi ngu vbela tshivba; u nga nyi siheli khovbe yago, gasi nyi si fanani ni avo va fudego. 8 Nyi nonedze lihaladzo lago gukhugela vbadzimindrutunu, kholu eni nyi tumbide uwe; hefemulo wangu nyi ngu wu yisa iyo gwago, nyi nonedze ndzila nyi yelago gubela khiyo. 9 Pfhumu Nungungulu, nyi vbulugise ga valala vangu; kholu eni nyi ngu thavela avbo gwago. 10 Uwe khuwe Nungungulu wangu, nyi hevbudze gu gira guhaladza gwago, liphuvbo lago nya wuhindzi, li na nyi gimbidzise khu ndzila nya gululame. 11 Pfhumu Nungungulu, nyi vbanyise khu kotani nya lina lago, nyi tshule gigaradzoni nya gikhongolo khu gululama gwago. 12 Khu kotani nya wuhindzi wago, fuvisa valala vangu, mbembisa vatshavbo va nyi wugelago, kholu eni nyi githumi gyago. |
Gitonga DC Bible © Bible Society in Mozambique, 2014.
Bible Society of Mozambique