Dzindzimo 14 - Bhibhiliya Nya Guage

Nungungulu a ngu emela va nya gululama

Ga muthangeli nya vaembeleli. Ndzimo ya Dhavhidhe

¹ Muthu nya giphuguphugu a gu ganela monyoni gwaye, khuye: “Nungungulu mwalo!” Mithumo yaye yi nyenyezide, mwalo na moyo a girago nya sadi.

² Pfhumu Nungungulu a di noga a khedzisa khu ndzadzini, a wona sanana nya vathu, khuye a na mana moyo nya wadi, mwendro moyo a vbwetago Nungungulu.

³ Aholu, vatshavbo va pengide, va lamade; mwalo na moyo a girago nya sadi, mwalo ni moyo basi.

⁴ Ina va nya guvivba vatshavbo kha va pimi gilo, gani? Va gu tsagudzela vathu vangu, nga khwatshi va gu hodza gibaba, nyamba rana lina la Pfhumu Nungungulu.

⁵ Va na ndrendremela khu hwanga kholu Pfhumu Nungungulu a gu ema ni vale va lulamidego.

⁶ Enu mu zamago gu sega wusingalagadzi nya sisiwana, dzitini gukhenu Pfhumu Nungungulu khuye wuthavelo wawe.

⁷ Nari pwani khu Siyoni, gu nguta guvbanyiswa ga Israyeli! Gikhati Pfhumu Nungungulu a na wuyisago nyaluphye sanana nya vathu vaye si vbagedwego, Jakobe a di hadza gu womba mikulungwane, Israyeli a di hadza gunengela ngudzu.