Dzindzimo 139 - Bhibhiliya Nya Guage

Nungungulu a nguti satshavbo

Ga vathangeli nya tsawa nya vaembeleli. Ndzimo ya Dhavhidhe

¹ Pfhumu Nungungulu, uwe u nyi holelede gwadi, olu u ngu nyiti.

² U ngu nyi pima gukhuga ni guema, khu hwindzo u ngu yiti mipimiso yangu.

³ U ngu nyi wona nya gu bani nyi gimbila ni gu bani nyi lade, u ngu dziti dzindzila dzangu dzatshavbo.

⁴ Nyi si gu tuli likana langu, uwe Pfhumu Nungungulu u ngu si pima esi nyi vbwetago gu ganela.

⁵ U nyi randrede khu maphuvbo yatshavbo u handzegide mandza yago vbatshani gwangu.

⁶ Ndzila u nyitigo khiyo yi ngu nyi samadzisa ngudzu, yi khusegide, kha nyi kodzi gu yi pima.

⁷ Nyi naya hayi gasi gu khala hwindzo ni liphuvbo lago? Nyi na thavela hayi gasi nyi manega hwindzo ni khovbe yago?

⁸ Nya gu gwela ndzadzini, uwe u womo iyoyo, nya gu relela tigoni nya vafi, uwe u womo iyoyo gambe.

⁹ Ambari nya gu mana mambapi nyi puruma nyiya Khugadambo, mwendro guya vbaha mahegiso nya linene,

¹⁰ khilo gambe libogo lago li na nyi gimbidzisago kala iyoyo, gyandza gyago gya nyamudye gi ngu nyi sayisa.

¹¹ Ambari nya gu lomba gukheni nyi fenengedzwa khu gidema, wenengedzo wu na vbindrugedza wu khala wutshigu.

¹² Gwago uwe, gidema kha gi sivbali, wutshigu wa gu aga kha nga mihani, avbo gwago gidema ni wenengedzo khidzosaye.

¹³ Khuwe u nga wumba mili wangu, u nyi sayisa ndrani ga mayi wangu.

¹⁴ Nyi ngu gu bonga kholu u nyi wumbide khu mawumbelo nya gusamadzise, mithumo yago yi ngu liwugisa, hefemulo wangu wu ngu dziti gwadi.

¹⁵ Uwe u nyi wone gikhati marambo yangu ma nga bani ma yingedwa, gikhati nyi nga bani nyi gu vbahwa mugusihalani, ndrani ga mayi wangu, avbo nyi nga bani nyi gu dandra guetani nya mafu.

¹⁶ Maho yago ma nyi wone, eni nyi si gu velegwi, ni matshigu nya guvbanye gwangu, ma lovidwe yatshavbo libhukuni gwago, ni limwedo basi nya ayo li si gu manegi.

¹⁷ Pfhumu Nungungulu, makungo yago ma na ni lisima ngudzu, ma tade ngudzu nyambana vasayi.

¹⁸ Nari gu ma sayela, ma ngu vbindra fungu wa phwani khu gutala, hi di hadza gu ma sayela nyamba vboha mahegiso.

¹⁹ Pfhumu Nungungulu, fuvisa guvbanya gwa va nya guvivba, u ndreyisa sighevenga siya hwindzo ni eni.

²⁰ Avo va gu ganela guvivba khu uwe, valala vago va gu ganela malipha khu lina lago.

²¹ Pfhumu Nungungulu, nyi ngu va venga ngudzu avo va gu vengago! Nyi ngu va nyenya avo va gu wugelago,

²² nyi ngu va venga khu monyo wangu watshavbo, nya gu va wona kha nga valala.

²³ Nyi khedzise gwadi, uwe Nungungulu; nyi linge uti mapimo yangu;

²⁴ u wona mwendro nyi ngu gimbila khu ndzila nya guvivbe u nyi gimbidzisa khu ndzila nya gupindruge.