Dzindzimo 133 - Bhibhiliya Nya Guage

Lihaladzo nya wundruye

Ndzimo ya avo va gwelago nombelotunu. Ndzimo ya Dhavhidhe

¹ Nga pwani gutshamba ni gutsakisa, valongo va gu vbanya dangamwedo khu gupwanana!

² Gufanana ni mafura nya gunungele ma thedwego hungoni ga Aroni, ma kwiriga ma naganisa giledzu gyaye, ma gu vboha kala ni dzitshokani nya guambale gwaye.

³ Gufanana ni mumya wa gigomoni gya Herimoni, wu thegago sigomoni sa Siyoni. Khavbo vbale Pfhumu Nungungulu a hi rumelago makategwa, ni guvbanya nya gupindruge.