Dzindzimo 130 - Bhibhiliya Nya Guage

Gutumba Pfhumu Nungungulu

Ndzimo ya avo va gwelago nombelotunu

¹ Khu guetani nya nondrwa nya sigaradzo, nyi ngu lila gwago Pfhumu Nungungulu.

² Tula ndzeve u yingisa lito nya nombelo wangu.

³ Pfhumu Nungungulu, nari pwani wa gu pima khu siwono sathu, khu mani a nga hadza gu dugelela Pfhumu?

⁴ Aholu avbo gwago u ngu kodza gu divalela avo va gu ningago githawo.

⁵ Hefemulo wangu wa gu tumba uwe Pfhumu Nungungulu; eni nya gu lirela magana yago.

⁶ Hefemulo wangu wa gu lirela Pfhumu Nungungulu, guvbindra edzi vawoneleli va kheviselago khidzo Wuronga.

⁷ Israyeli a gu lirela Pfhumu Nungungulu, kholu, ga Pfhumu Nungungulu womo wuhindzi; a ngu hi vbulugisa dzimhango nya gutale.

⁸ Uye a na dzegisago Israyeli muguvivbani gwaye gwatshavbo.