Dzindzimo 126 - Bhibhiliya Nya Guage

Gililo gi na vbindrugedza gi khala litsako

Ndzimo ya vale va gwelago nombelotunu

¹ Avbo Pfhumu Nungungulu a nga wuyisa sanana sa Siyoni, gu di gira gukhwatshi ha gu lora.

² Maganani gwathu gu di tala khu mahego nya gunengele, malimi yathu ma di kulungela; ni mambe mayigo ma di ganela, khayo: “Pfhumu Nungungulu a va girede silo sikhongolo.”

³ Khidzo kamwe, Pfhumu Nungungulu a hi girede silo sikhongolo, khu guralo, hi ngu nengela.

⁴ Pfhumu Nungungulu, vbindrugedza wugumbi wathu wu khala litsako; wu fanana ni mitsongo ya Marandzi.

⁵ Avo va yalago na va gu lila, va na vbwera na va gu tsaka.

⁶ Va diya guyalatunu na va gu lila, olu va ngu wuya na va gu kulungela na va rwade situndru nya dzimbewu.