Dzindzimo 125 - Bhibhiliya Nya Guage

Nungungulu a ngu vhikela vale va khodwago gwaye

Ndzimo ya avo va gwelago nombelotunu

¹ Avo va tumbago Pfhumu Nungungulu va ngu fanana ni gigomo gya Siyoni, gi si tsekatsekigo, gi tiyidego kala gupindruga.

² Kha nga sigomo si randredego Jerusalema, kharato nugo, Pfhumu Nungungulu a ngu randrela vathu vaye, olu ni gikhati gyatshavbo.

³ Avo va girago guvivba, kha va na fuma kala gupindruga tigoni ga vathu nya gululame, gasi va nya gululama va si khusedzi mandza va gira guvivba.

⁴ Pfhumu Nungungulu, gira nya sadi ga avo va gu vadi ni ga vale va gu ni monyo wu lulamidego.

⁵ Aholu, vale va ndreyago va bela khu dzindzila nya guvivbe, Pfhumu Nungungulu a na va pata gumogo ni sighevenga. Gurula gu na manege ga va na Israyeli!