Dzindzimo 124 - Bhibhiliya Nya Guage

Nungungulu a gu emela vathu vaye

Ndzimo ya avo va gwelago nombelotunu. Ndzimo ya Dhavhidhe

¹ Nari pwani Pfhumu Nungungulu kha nga ema ni ethu, Israyeli a na ganele!

² Nari pwani Pfhumu Nungungulu kha nga ema ni ethu, gikhati valala vathu va nga hi wugelago,

³ na va hi midzide na hi nga gu vbanya, khu kotani nya likhulo va gu nalo khu ethu;

⁴ na hi langaladzidwe khu mati, hi ndrindrwa khu mwedzi nya tsongo;

⁵ na hi midzidwe khu mati ma vhilugago.

⁶ A na bongwe Pfhumu Nungungulu a ngamba hi diga, hi thegela mandzani ga valala vathu.

⁷ Kha nga ginyoni, hi vbulugide gu modwa khu naphwi wa mudembeli, gu di kaviga lizinga, ethu hi vbuluga.

⁸ Giphaso gyathu ha gu gi mana linani la Pfhumu Nungungulu, a nga gira ndzadzi ni mafu.