Dzindzimo 122 - Bhibhiliya Nya Guage

Nombelo nya gulombe gurula Jerusalema

Ndzimo ya avo va gwelago nombelotunu. Ndzimo ya Dhavhidhe.

¹ Nyi nengede gikhati nyi nga embedwa, gupwani: “Hongoleni Nyumbani ga Pfhumu Nungungulu!”

² Migondro yathu yi vbohide dzinyangwani gwago uwe Jerusalema!

³ Jerusalema, lidhoropa li vbahidwego gwadi li tiya, li vbahidwego khu gu mburisedwa.

⁴ Khiyo ma gwelago ma ya tombana mahundzu ya Pfhumu Nungungulu, gasi guya tadzisa dzifanelo nya nayo wa Israyeli, dzifanelo nya nayo wa Israyeli, gasi guya rungudza lina la Pfhumu Nungungulu.

⁵ Si vegidwe iyo sikhalo nya gulamule mahungu, sikhalo nya wufumu wa nyumbani ga Dhavhidhe.

⁶ Lombelelani gasi gu manege gurula Jerusalema! Va na vbanye na va tangade avo va gu golago.

⁷ Gu na tale gurula mabhiyoni gwago ni gutangala dzinyumbani gwago nya wufumu.

⁸ Khu lihaladzo nyi lipwago khu valongo ni dzipari dzangu, nyi na, kheni: “Gurula gu na khale ni uwe!”

⁹ Khu kotani nya lihaladzo nya Nyumba ya Pfhumu Nungungulu wathu, nyi na gu lombela makategwa.