Dzindzimo 120 - Bhibhiliya Nya Guage

Nombelo wa muthu a guromo mhangoni

Ndzimo ya avo va gwelago nombelotunu

¹ Nyi ranide Pfhumu Nungungulu na nyiri vbakari nya sigaradzo, uye a nyi hakhide.

² Pfhumu Nungungulu, nyi vbulugise ga vathu nya malipha ni wukanganyisi.

³ Uwe lidimi nya mukanganyisi, u na wuyedwa khu ginani, tshatshazelo muni u na wu manago?

⁴ Siholoma nya gulodzwe sa ndrena si vbisidwego niloni nya magala nya renge.

⁵ Libango langu, eni nyi gu muluveli tigoni ga Meseki nyi vbanyago mitshatshani ya Kedhari.

⁶ Nyi garade khu gu vbanya vbakari nya vathu va vengago gurula.

⁷ Nya gu va embela khu mahungu nya gurule; avo va gu alakanya gu dwana nyimbi.