Dzindzimo 12 - Bhibhiliya Nya Guage

Nombelo nya gulombe gu phaswa khu Nungungulu

Ga muthangeli nya tsawa nya vaembeleli. Ndzimo ya Dhavhidhe

¹ Nyi vbanyise Pfhumu Nungungulu, kholu, vathu nya gululame va vbede, gutumbega gu mwalo gambe vbakari nya vathu.

² Muthu ni muthu, a gu liphela muthu kwawe khu magana nya gusengedzele ni gupemba.

³ Pfhumu Nungungulu, pila sihofu nya malipha, sa avo va ganelago khu matshandza,

⁴ avo va gukhavo: “Lidimi khilo tshivba yathu, magana yathu ma ngu hi vhikela, khu mani a hi fumago?”

⁵ Kholu Pfhumu Nungungulu a di khuye: “Olu nyi na khuga nyi ema, kholu va nya gusolega va ngu saniswa, sisiwana si ngu keta khu wuvi nyi na va resela guvbanyiswa va gu vbwetago.”

⁶ Magana ya Pfhumu Nungungulu khya lisine, ma agide gu fanana ni parata yi hutidwego, yi mburisedwa ngudzu niloni, livbandre na dzimbili dzinyondro.

⁷ Ina, Uwe Pfhumu Nungungulu u na hi sayisa, u hi vbulugisa ga melana yoyu kala gupindruga.

⁸ Vathu nya guvivbe va gu legalega maphuvbo yatshavbo, vatshavbo va gu ninga wuzundzo silo nya gunyenyeze.