Dzindzimo 119 - Bhibhiliya Nya Guage

Ndzimo nya gu dhumise Nayo wa Nungungulu

Alef

¹ Va kategide vale va gimbilago khu ndzila nya gululame, avo va landrisago milayo ya Pfhumu Nungungulu.

² Va kategide avo va girago guhaladza gwaye, avo va mu vbwetago khu monyo wawe watshavbo.

³ Avo va thavago gu gira esi nya guvivbe, aholu va gimbilago ndzilani gwaye.

⁴ Uwe u vegide milayo yago, gasi hi mi sayisa gwadi.

⁵ Nya gu gola ngudzu gutiya ndzilani nya gutumbege, na nyi gu landrisa milayo yago.

⁶ Gima kha nyi na nga khala dzitshoni, nya gu thela kota sileletelo sago.

⁷ Nyi na gu bonga khu monyo wu agidego, avbo nyi na hevbulago milayo yago nya gululame.

⁸ Nyi na sayisa sileletelo sago; u nga nyi digeli muphelo. Bet

Bet

⁹ Lidzaha li na dzi khodza karini gu agisa mavbanyelo yaye? Khu gu vegisa basi mahungu yago.

¹⁰ Eni nya gu gu vbweta khu monyo wangu watshavbo, U nga nyi digi nyi penga, nyi hambana ni sileletelo sago.

¹¹ Nyi ngu vegisa monyoni gwangu mahungu yago, gasi nyi si gu ghoheli.

¹² U na rungudzwe uwe Pfhumu Nungungulu! Nyi hevbudze guti milayo yago!

¹³ Nyi ngu sawutela khu likana langu silayelo satshavbo esi u nyi embedego.

¹⁴ Nya gu tsaka khu ndzila nya wufakazi wago, guvbindra gu mana dzithomba dzatshavbo.

¹⁵ Nyi na alakanyela sileletelo sago satshavbo nyi ninga githawo dzindzila dzago.

¹⁶ Nyi na tsakela sirumo sago; nyi si divali mahungu yago. Guimel

Guimel

¹⁷ Girela nya sadi eni githumi gyago, nyi fela gu vbanya nyi landrisa mahungu yago.

¹⁸ Tula maho yangu, gasi nyi wone siliwugiso nya nayo wago.

¹⁹ Nyi muvbindri nya ndzila ga eli litigo, U nga nyi siheli milayo yago.

²⁰ Hefemulo wangu wu ngu vbela tshivba khu gu vbweta guti milayo yago.

²¹ U ngu kawuka va nya matshandza, va dzi girelago libango khu gu ndraga milayo yago.

²² Nyi vbulugise gu vadwa ni gu nyenywa khavo, kholu eni nyi ngu landrisa milayo yago.

²³ Ambari vafumeli va gu nyi lemba, githumi gyago gi na alakanyela sileletelo sago.

²⁴ Nyi ngu nengela ngudzu khu milayo yago; khiyo yi nyi ningago wusingalagadzi. Dalet

Dalet

²⁵ Nyi vbede tshivba nyi thega vbavbatshi; wusedza gambe tshivba yangu kha nga gitumbiso gyago.

²⁶ Nyi gu dawulede guvbanya gwangu gwatshavbo, Uwe U nyi hakhide, nyi hevbudze guti milayo yago.

²⁷ Nyi phase gupwisisa milayo yago, gasi nyi kodza gu alakanyela mithumo yago nya gusamadzise.

²⁸ Hefemulo wangu wu ngu lila marongo nya wuvi; nyi tiyise kha nga gitumbiso gyago.

²⁹ Nyi hambanise ni ndzila nya malipha, khu wuwadi wago nyi hevbudze guti nayo wago.

³⁰ Nyi hathide gu tiyisela ndzilani nya lisine, nyi sambanyide gu landrisa sileletelo sago.

³¹ Nyi ngu namarela milayo yago, Pfhumu Nungungulu, U nga dzumedzisi gukhuwe nyi thedwa dzitshoni.

³² Nyi na dzi garadza khu gu landra ndzila nya milayo yago, kholu yi ngu tadza khu gunengela. He

He

³³ Pfhumu Nungungulu, nyi hevbudze guti ndzila nya sileletelo sago, gasi nyi si landrisa kala mahegiso.

³⁴ Nyi ninge mapimo, gasi nyi vegisa gwadi nayo wago, nyi na wu landrisa khu monyo wangu watshavbo.

³⁵ Nyi gimbidzise khu ndzila nya sileletelo sago, kholu khiso si nyi tsakisago.

³⁶ Gira monyo wangu wu gola ngudzu milayo yago gasi nyi si beli manaveloni.

³⁷ Ndreyisa maho yangu gasi nyi si woni silo si si phasigo, nyi tiyise ndzilani gwago.

³⁸ Tiyisa ga eni githumi gyago gitumbiso gyago, u nga girago ni avo va gu ningago githawo.

³⁹ Ndreyisela hwindzo givalo nyi gi thavago, kholu gulamula gwago gululamide.

⁴⁰ Wona, eni nyi ngu gola ngudzu milayo yago; nyi tiyise khu gululama gwago. Vau

Vau

⁴¹ Pfhumu Nungungulu, wuhindzi wago wu nate avbo gwangu, U nyi vbanyisa kha nga gitumbiso gyago.

⁴² Kharati, nyi na kodza gu ninga phindrulo avo va nyi valago; kholu nyi ngu tumba magana yago.

⁴³ U nga dzumedzisi gu ndreyiswa gambe khu kanani magana nya lisine, kholu nyi ngu tumba sileletelo sago.

⁴⁴ Nyi na simama gu landrisa nayo wago, kala gupindruga ni gupindruga.

⁴⁵ Nyi na vbanya na nyi tshulegide, kholu nyi landriside sileletelo sago.

⁴⁶ Nyi na huwelela gambe sileletelo sago mbeli ga vafumeli, gima kha nyi na khala dzitshoni.

⁴⁷ Nyi na nengedziswa khu milayo yago kholu nyi ngu mi gola.

⁴⁸ Nyi na khusedza mandza yangu ga sileletelo sago nyi si golago; nyi na alakanyela sileletelo sago. Zain

Zain

⁴⁹ Dundruga gitumbiso u giridego ni githumi gyago, a gu magana ma nyi ningidego gutumba.

⁵⁰ Iso si nyi tangadzisago wuvini gwangu khesi: Khu magana yago ma nyi ningago guvbanya.

⁵¹ Va nya matshandza va gu nyi hega gikhati gyatshavbo, aholu eni kha nyi hambani ni nayo wago.

⁵² Pfhumu Nungungulu, nyi ngu alakanya sileletelo sago sa gale, nyi na mana gu tangadziswa.

⁵³ Nya gu pwiswa wuvi nya wukhongolo khu va nya guvivbe, kholu kha va theli kota khu nayo wago.

⁵⁴ Milayo yago yi ngu nyi gira nyi thula dzindzimo, ndzilani nya liendro langu.

⁵⁵ Pfhumu Nungungulu, nyi ngu alakanya lina lago, vbakari nya wutshigu nya gu landrisa nayo wago.

⁵⁶ Satshavbo sesi si ngu kodzega; kholu nyi ngu sayisa sileletelo sago. Heti

Heti

⁵⁷ Pfhumu Nungungulu khuye thomba yangu; nyi tumbiside gu landrisa magana yago.

⁵⁸ Nyi ngu gu lomba khu monyo wangu watshavbo; nyi pwele wusiwana, kha nga gitumbiso gyago.

⁵⁹ Nyi khade nyi alakanyela mavbanyelo yangu, nyi vbindrugedzide nyi landrisa milayo yago.

⁶⁰ Nyi ngu vbiredza kha nyi hweli, gu landrisa sileletelo sago.

⁶¹ Va nya guvivba va nyi randrede ni mazinga yawe, aholu, eni gima kha nyi na divala nayo wago.

⁶² Nyi na wuga vbakari nya wutshigu nyi gu rungudza, khu kotani nya gulamule gwago gu lulamidego.

⁶³ Eni nyi pari ya vatshavbo va gu ningago githawo, ni ya vale va landrisago sileletelo sago.

⁶⁴ Pfhumu Nungungulu, litigo li tade khu wuhindzi wago; nyi hevbudze sileletelo sago. Tet

Tet

⁶⁵ Pfhumu Nungungulu, u nyi pharide gwadi eni githumi gyago, kha nga gutumbisa gwago.

⁶⁶ Nyi hevbudze gwadi nayo nya wadi ni mapimo, kholu nyi ngu khodwa ga milayo yago.

⁶⁷ Nyi pengide ngudzu nu si gu nyi tsayisi, olu nyi ngu vegisa magana yago.

⁶⁸ Uwe U wadi u ngu gira nya sadi, nyi hevbudze gupima sileletelo sago.

⁶⁹ Va nya matshandza va gu nyi singedza malipha, aholu eni nyi ngu vegisa milayo yago khu monyo wangu watshavbo.

⁷⁰ Myonyo yawe yi bangide, gambe kha vapwi gilo, aholu eni nya gu tsakela ngudzu nayo wago.

⁷¹ Gutshaniseka gwangu gu nyi phaside, kholu nyi hevbude guti milayo yago.

⁷² Nayo wu dugago khu kanani gwago, wu na ni giphaso ngudzu, guvbindra mazana ni mazana nya ndralama ni parata. Yod

Yod

⁷³ Uwe U nyi wumbide U nyi tiyisa khu mandza yago; nyi hevbudze guti milayo yago.

⁷⁴ Va gu nyi wona va na nengela avo va gu ningago githawo, kholu eni nyi ngu tumba magana yago.

⁷⁵ Pfhumu Nungungulu, nyi ngu dziti gwadi gukheni gulamula gwago gu lulamide, khwa hosisa olu U nga nyi tsayisa.

⁷⁶ Lihaladzo lago li na nyi tangadzise, kha nga U tumbisidego ga eni githumi gyago.

⁷⁷ Nyi tshisele makategwa yago, nyi na vbanya; kholu nayo wago wu ngu nyi nengedzisa.

⁷⁸ Va na tale khu dzitshoni va nya matshandza, va nyi tshanisago nyambana nandru, gasi eni nyi na alakanyela sileletelo sago.

⁷⁹ Va na wuye gwangu avo va gu ningago githawo, avo va wutigo nayo wago.

⁸⁰ Monyo wangu wu na vbelele khu gu landrisa sileletelo sago, gasi nyi si thedwi dzitshoni. Caf

Caf

⁸¹ Hefemulo wangu wa gu khedzisela guvbanyisa gwago; kholu eni nyi ngu tumba magana yago.

⁸² Maho yangu ma garade khu gu khedzisela gu tadzisega nya gitumbiso gyago, na nyi gu wudzisa, kheni: “Lini U na tago U ta nyi tangadzisa?”

⁸³ Nyi gumbide kha nga lidowo li divadwego githathini, aholu kha nyi divali sileletelo sago.

⁸⁴ Khu wevbi tengo nya matshigu ya githumi gyago? Lini U nata nyi lamulago ni avo va nyi tshanisago?

⁸⁵ Va nya matshandza va si theligo kota khu nayo wago, va nyi kembede liphala.

⁸⁶ Milayo yago yatshavbo yi tumbegide; nyi phase ga avo va nyi tshanisago mahala.

⁸⁷ Vbadugwana basi va di vbweta gu nyi fuvisa mafuni; aholu eni kha nyi digi gu landrisa sileletelo sago.

⁸⁸ Khu wuhindzi wago nyi vbanyise, gasi nyi landrisa milayo nya guduge khu kanani gwago. Lamed

Lamed

⁸⁹ Uwe Pfhumu Nungungulu, mahungu yago ma tiyisidwe ndzadzini kala gupindruga.

⁹⁰ Gutumbega gwago gu ngu thaphela ga mimela ni mimelana; u wumbide litigo u li tiyisa wulanga waye.

⁹¹ Na muhuno satshavbo si ngu simama gukhedza khu guruma gwago, kholu silo satshavbo sa gu thumela uwe.

⁹² Nasiri olu nyi tsakiswago khu nayo wago, na nyi fude gale gusanisekani gwangu.

⁹³ Gima kha nyi na divala sileletelo sago, kholu u ngu nyi vbanyisa khiso.

⁹⁴ Nyi vbanyise, kholu eni nyi wago, nyi ngu landrisa sileletelo sago.

⁹⁵ Va nya guvivba va gu zama gu nyi fuvisa, gasi eni nya gu alakanyela milayo yago.

⁹⁶ Nyi wonide nya gukheni silo satshavbo si na ni mahegiso; aholu sileletelo sago si mwalo mahegiso. Mem

Mem

⁹⁷ Oh! Idzo nyi wu golago khidzo nayo wago! Litshigu latshavbo nya gu alakanya uwo.

⁹⁸ Sirumo sago si ngu nyi bangaladza gikhati gyatshavbo, si ngu nyi ninga guti guvbindra valala vangu.

⁹⁹ Nyi ngu pimisa gwadi guvbindra vahevbudzi vangu, kholu nyi ngu alakanyela sileletelo sago.

¹⁰⁰ Nyi nguti guvbindra madhota, kholu nyi ngu vegisa sileletelo sago.

¹⁰¹ Nyi ngu ndreya ga dzindzila dzatshavbo nya guvivbe, gasi gu vegedza magana yago.

¹⁰² Kha nyi hambani ni sileletelo sago, kholu uwe u ngu nyi hevbudza.

¹⁰³ Idzo ma tshambago khidzo mahungu yago kanani gwangu! Ma gu lombela ngudzu guvbindra wulombe.

¹⁰⁴ Khu kotani nya sileletelo sago, nyi khade muthu nya mapimo; khu guralo, nyi ngu nyenya dzindzila dzatshavbo nya malipha. Nuni

Nuni

¹⁰⁵ Magana yago kandriya nya migondro yangu, ni wenengedzo nya dzindzila dzangu.

¹⁰⁶ Nyi sambanyide nyi tiyisa gukheni nyi na vegedza milayo yago nya gululame.

¹⁰⁷ Nyi womo gutshanisekani nya gukhongolo; Pfhumu Nungungulu, nyi vbanyise kha nga gutumbisa gwago.

¹⁰⁸ Hakha Pfhumu Nungungulu nombelo wangu nya gubonge uwe, nyi hevbudze milayo yago.

¹⁰⁹ Womi wangu womo mhangoni nya gufe, aholu, kha nyi divali nayo wago.

¹¹⁰ Va nya guvivba va nyi riyede naphwi, aholu gima kha nyi hambani ni sileletelo sago.

¹¹¹ Milayo yago yi khade thomba yangu kala gupindruga, kholu yi ngu tsakisa monyo wangu.

¹¹² Monyo wangu wu dzi vegisede gu landrisa sileletelo sago, gikhati gyatshavbo kala gufa. Samec

Samec

¹¹³ Nyi ngu vengana ni wukanganyisi aholu nyi gola nayo wago.

¹¹⁴ Uwe u wuthavelo ni gitshangu gyangu, eni nya gu tumba magana yago.

¹¹⁵ Leyani hwindzo gwangu enu va nya guvivba, gasi nyi sayisa sileletelo sa Nungungulu wangu.

¹¹⁶ Nyi seketele khu gitumbiso gyago nyi na vbanya, u nga nyi digi nyi thedwa dzitshoni kholu, nyi tumbide uwe.

¹¹⁷ Nyi phase gasi nyi mana guvbanya, nyi na vegisa sileletelo sago gikhati gyatshavbo.

¹¹⁸ U ngu nyenya vatshavbo avo va hambanago ni sileletelo sago, kholu maalakanyo yawe khya wukanganyisi.

¹¹⁹ Va nya guvivba vatshavbo va tigoni wa gu va wona nari ndzilo, Khu guralo, eni nyi ngu gola sileletelo sago.

¹²⁰ Mili wangu wu ngu ndrendremela mbeli gwago khu gu gu thava, khu kotani nya guthave milayo yago. Ain

Ain

¹²¹ Nyi sayiside nayo ni gululama, u nga nyi digi nyi thegela mandzani ga valala vangu.

¹²² Nyi phare khu mandza mavili eni githumi gyago, u nga digi va nya matshandza va nyi tshanisa.

¹²³ Maho yangu ma ngu vbisa khu gu khevisela guvbanyisa gwago, na nyi gu lirela guvbanyiswa kha nga u nyi tumbisidego.

¹²⁴ Sayisa eni githumi gyago khu lihaladzo lago, nyi hevbudze milayo yago.

¹²⁵ Eni nyi githumi gyago, nyi ninge mapimo, gasi nyi pima sileletelo sago.

¹²⁶ Pfhumu Nungungulu, olu gikhati gyago nya guphodze, kholu avo va hambanide ni nayo wago.

¹²⁷ Nya gu gola ngudzu milayo yago, guvbindra ndralama nya gukhedzige ngudzu.

¹²⁸ Khu guralo, nyi ngu wona gukheni sileletelo sago si lulamide, nyi ngu vengana ni dzindzila dzatshavbo nya malipha. Phe

Phe

¹²⁹ Sileletelo sago si ngu samadzisa, khu guralo, nyi ngu si vegisa khu monyo wangu watshavbo.

¹³⁰ Tshamuselo nya mahungu yago wu ngu tula maho, wu ngu ninga gupima va nya gusolega.

¹³¹ Nya gu tula likana na nyi havbide, kholu nyi na ni ndzala nya milayo yago.

¹³² Nyi khedze u nyi pwela wusiwana, kha nga idzo u girago ga vale va golago lina lago.

¹³³ Tiyisa migondro yangu ndzilani nya mahungu yago, u nga nyi digi nyi fumwa khu guvivba.

¹³⁴ Nyi vbulugise gusaniswa khu vathu, nyi na kodza gu vegedza sileletelo sago.

¹³⁵ Wenengedza githumi gyago khu gungangamela nya khovbe yago, nyi hevbudze milayo yago.

¹³⁶ Marongo ma gu goga kha nga tsongo khu mahoni gwangu, kholu vathu kha va sayisi milayo yago. Tsadh

Tsadh

¹³⁷ Pfhumu Nungungulu uwe u lulamide, ni gulamula gwago khwa lisine.

¹³⁸ U hi ningide sileletelo sago khu gululama, ni gutumbega nya gukhongolo.

¹³⁹ Nyi ngupwa wuvi ngudzu, kholu valala vangu kha va theli kota khu mahungu yago.

¹⁴⁰ Magana yago ma tiyisidwe gwadi, khu guralo, githumi gyago gi ngu ma gola.

¹⁴¹ Nyi muthu nya nyalidede ni gusolega, aholu, kha nyi divali sileletelo sago.

¹⁴² Gululama gwago gu vbelede kala gupindruga, ni nayo wago wu tiyide lisineni.

¹⁴³ Nyi ngu ganwa khu wuvi ni sigaradzo, aholu nyi ngu tangadziswa khu sileletelo sago.

¹⁴⁴ Sileletelo sago si lulamide kala gupindruga, nyi ninge gu si pima, nyi na vbanya. Qof

Qof

¹⁴⁵ Pfhumu Nungungulu, nyi ngu gu rana khu monyo wangu watshavbo; nyi yingise, nyi kodza gu vegisa milayo yago.

¹⁴⁶ Nyi ngu lomba gwago, nyi vbanyise, nyi na sayisa sileletelo sago.

¹⁴⁷ Wu si gu khugi Wuronga, eni nyi ngu phindrula nyi gu rana, nyi ngu tumba magana yago.

¹⁴⁸ Nya gu pilekelana wutshigu watshavbo nyamba lala, na nyi gu alakanyela gitumbiso gyago.

¹⁴⁹ Pfhumu Nungungulu yingisa lito langu, khu wuhindzi wago, nyi vbanyise kha nga gitumbiso gyago.

¹⁵⁰ Nyi vbohedwe khu vasanisi vangu va gu ni makungo nya guvivbe, avo va gu hambana ni nayo wago.

¹⁵¹ Uwe Pfhumu Nungungulu, u womo vbafuvbi ngudzu, milayo yago yatshavbo yi tiyide.

¹⁵² Gale nyi na sitide sileletelo sago, gukheni khuwe u si tiyisidego kala gupindruga. Resh

Resh

¹⁵³ Wona gusaniseka gwangu, u nyi vbanyisa, kholu kha nyi divali nayo wago.

¹⁵⁴ Vhikela mahungu yangu u nyi tshula, nyi vbanyise kha nga gutumbisa gwago.

¹⁵⁵ Guvbanyisa gomo hwindzo ga va nya guvivba, kholu kha va khathaleli milayo yago.

¹⁵⁶ Pfhumu Nungungulu, wuhindzi wago wu khongolo; nyi vbanyise khu ndzila nya situmbiso sago.

¹⁵⁷ Vangi vasanisi ni valala vangu, aholu kha nyi hambani ni milayo yago.

¹⁵⁸ Nya gu wona vakanganyisi nya gu saniseka ngudzu, kholu, kha va vegisi magana yago.

¹⁵⁹ Wona idzo nyi golago khidzo sileletelo sago, uwe Pfhumu Nungungulu, nyi vbanyise khu wuwadi wago.

¹⁶⁰ Gukhugela guhegulani mahungu yago ma tiyide ma na ni lisine, sileletelo sago satshavbo si ngu simama kala gupindruga. Sine

Sine

¹⁶¹ Vathangeli nya litigo va gu nyi sanisa nyambana nandru, aholu monyoni gwangu nyi ngu thava mahungu yago.

¹⁶² Nyi ngu nengela khu gitumbiso gyago, kha nga muthu a manago thomba nya gutale.

¹⁶³ Nyi ngu venga ni gu nyenya malipha, aholu nyi ngu gola ngudzu nayo wago.

¹⁶⁴ Eni nyi ngu gu rungudza livbandre na dzimbili dzinyondro khu litshigu, khu kotani nya gulamule gwago gu lulamidego.

¹⁶⁵ Avo va golago nayo wago va gu vbanya gurulani nya gukhongolo; gimwalo gi va khunguvanyisago.

¹⁶⁶ Pfhumu Nungungulu, eni nyi ngu lirela guvbanyisa gwago, nyi ngu sayisa sirumo sago.

¹⁶⁷ Hefemulo wangu wu ngu landrisa sileletelo sago; kholu nyi ngu si gola ngudzu guvbindrisa.

¹⁶⁸ Nyi ngu landrisa milayo ni sileletelo sago, kholu dzindzila dzangu dzatshavbo dzomo mbeli gwago. Tau

Tau

¹⁶⁹ Pfhumu Nungungulu, gulila gwangu gu na vbohe iyo gwago, nyivbe gupimisa kha nga gutumbisa gwago.

¹⁷⁰ Wu na vbohe iyo gwago nombelo wangu; nyi vbanyise kha nga u nyi tumbisidego.

¹⁷¹ Nyi na embelela ndzimo nya gu gurungudze, kholu u nyi hevbudzide guti sileletelo sago.

¹⁷² Nyi na huwelela nayo wago, kholu sileletelo sago satshavbo si lulamide.

¹⁷³ Delu khu guvbiredza u ta nyi phasa, kholu eni nyi hathide gu landrisa sileletelo sago.

¹⁷⁴ Pfhumu Nungungulu, eni nyi ngu lilela gu vbanyiswa khu uwe, nayo wago wu ngu tsakisa ngudzu monyo wangu.

¹⁷⁵ Nyi ninge guvbanya gasi nyi kodza gu gudhumisa, sileletelo sago si na nyi phasedzele.

¹⁷⁶ Nyi ngu legalega kha nga nvuta yi pengago; vbweta githumi gyago, kholu kha nyi divali sirumo sago.